لێژنەی ئاماری نیشتمانی ئۆزبەکستان ڕۆژی هەینی ٢6ی کانوونی یەکەمی 2025، لە ڕاپۆرتێکدا ڕایگەیاند، لە ماوەی ١١ مانگی ڕابردوودا ئەو وڵاتە بە بەهای ٣٠.٩ ملیار دۆلار کاڵای هەناردەی وڵاتانی جۆراوجۆر کردووە و لەو ژمارەیەش یەک ملیار و ٣٠٠ ملیۆن دۆلار هەناردەی ئەفغانستان کراوە.

لیژنەکە لە ڕاپۆرتێکدا بڵاویکردەوە، لە مانگی یەک تا تشرینی دووەمی 2025، هەناردەی ئۆزبەکستان بە بەراورد بە هەمان ماوەی ساڵی ڕابردوو بە ڕێژەی 26.2% زیادی کردووە.

بەگوێرەی ڕاپۆرتەکە، کۆی بەهای بازرگانی دەرەوەی ئۆزبەکستان لەم ماوەیەدا گەیشتووەتە 72.8 ملیار دۆلار کە بە بەراورد بە ساڵی ڕابردوو 21.8% زیاترە؛ کە 41.9 ملیار دۆلار بۆ هاوردە و 30.9 ملیار دۆلار بۆ هەناردەکردن تەرخانکراوە.

لێژنەی ئاماری نیشتمانی ئۆزبەکستان جەختی لەوە کردەوە کە جوگرافیای هەناردەکردنی ئەو وڵاتە بەردەوام لە فراوانبووندایە.

چین وەک گەورەترین هاوبەشی بازرگانی ئۆزبەکستان دەمێنێتەوە کە پشکی 20.1% یە، لە دوای ئەویش ڕووسیا بە ڕێژەی 16.2% و قەزاقستان بە ڕێژەی 6% و تورکیا بە ڕێژەی 3.7% و کۆریای باشوور بە ڕێژەی 2.2%. یە.

 

 

 

گوڵان: سەردار خەلیل