سەرۆکی هەرێمی کوردستان پیرۆزبایی لە یانەی زاخۆ دەکات بەبۆنەی بەدەستهێنانی خەڵاتی باشترین هاندەری جیهان و دەڵێت، "ئەم نازناوە جیهانییه‌، تەنها سەرکەوتنێک نییە بۆ یانەی زاخۆ، بەڵکوو شانازییە بۆ تەواوی بزووتنەوەی وەرزشی لە هەرێمی کوردستان و عێراق".

رۆژی سێشەممە، یانەی وەرزشیی زاخۆ خەڵاتی باشترین هاندەری جیهانیان پێبەخشرا.

نێچیرڤان بارزانی، سەرۆکی هەرێمی کوردستان پەیامێکی پیرۆزبایی بۆ سەرۆک و دەستەی کارگێڕی و هاندەرانی یانەی وەرزشیی زاخۆ نارد.

سەرۆکی هەرێمی کوردستان رایگەیاند، "بە گەرمی پیرۆزباییی ئەم دەستکەوتە جیهانییەتان لێ دەکەم کە تێیدا هانده‌رانی دڵسۆزی یانەی زاخۆ له‌لایه‌ن فیفاوه‌ وەک باشترین و کاریگەرترین هانده‌ر لەسەر ئاستی جیهان دەستنیشان کران".

نێچیرڤان بارزانی رایگەیاند، "ئەم نازناوە جیهانییه‌، تەنیا سەرکەوتنێک نییە بۆ یانەی زاخۆ، بەڵکو شانازییە بۆ تەواوی بزووتنەوەی وەرزشی لە هەرێمی کوردستان و عێراق".

سەرۆکی هەرێمی کوردستان بە هاندەرانی زاخۆ دەڵێت، "ئێوە بە جۆش و خرۆش و شێوازی شارستانییانەی هاندان، یاریگاکه‌تان کرده‌ تابلۆیەکی هونەریی جوان و پەیامی ئاشتی و خۆشەویستی و ژیاندۆستیی گەلی کوردستانتان بە جیهان گەیاند".