فۆسفۆر Phosphorus كانزایەكی گرنگە، دووەمین كانزایە پاش كالسیۆم لە ڕووی ڕێژە بەرزەكەی لە لەشی مرۆڤدا. ڕێژە هەرە زۆرەكەی فۆسفۆر كەوتووەتە ناو ئێسك، ددانەكان، خوێن لەگەڵ شانە نەرمەكان. سوودە تەندرووستییەكانی فۆسفۆر: بینا و پتەویی ئێسك و ددانەكان، هاندانی درووستبوونی ترشەكانی DNA و RNA، درووستبوونی سیانە فۆسفاتی ئەدینۆسین ATP كە سەرچاوەی وزەیە بۆ خانەكانی لەش، هاندانی ئاستی وزە و خەزنكردنی وزە، چالاككردنی ئەنزیمەكان، پاراستنی هاوسەنگیی ئاستی ترشێتی و تفتی pH، هەروەها ڕۆڵی هەیە لە گرژبوون و خاوبوونەوەی ماسوولكەكاندا، یارمەتیدانی فرمانی گورچیلەكان، یارمەتیدانی گەشە و نوێبوونەوەی خانەكانی لەش، پاراستنی ڕێكیی لێدانەكانی دڵ. خۆراكە دەوڵەمەندەكان بە فۆسفۆر: گۆشت، پەلەور، ماسی، شیر و بەرهەمەكانی، هێلكە، پاقلەمەنییەكان بەتایبەتی نیسك، كاكڵەكان بەتایبەتی كازۆ، دانەوێڵەی تەواو،پەتاتە. پێویستی ڕۆژانەی فۆسفۆر بۆ كەسانی پێگەیشتوو بریتییە لە 700 ملگم. هۆكارە هاندەرەكانی كەمیی فۆسفۆر لە لەشدا: نەخۆشیی شەكرە، خواردنەوە ئەلكهولییەكان، كەمبوونەوەی ئارەزووی خواردن، بەدخۆراكی، بەكارهێنانی دەرزیی ئینسولین یان دەرمانە ستیرۆیدەكان و دەرمانی دژی ترشێتیی گەدە Antacids. نیشانەكانی كەمیی فۆسفۆر لە لەشدا: ئازاری ئێسك و جومگەكان، كەمبوونەوەی ئارەزووی خواردن، هەستكردن بە ناڕەحەتی و پەستی، هەروەها هەستكردن بە ماندووبوون.