سبەی سلێمانی میوانداری كۆتایی پاڵەوانیەتی شەتڕەنجی كوڕانی عێراق دەكات
زاگرۆس نانەكەلی
سبەی چوارشەممە رێكەوتی 25-10-2023 شاری سلێمانی میوانداریی قۆناغی‌ كۆتایی‌ پاڵەوانێتی‌ شەترەنجی‌ كوڕانی عێراق دەكات و لە پاڵەوانێتییەكەدا 12 یاریزان ركابەریی لەسەر نازناوەكە و بوونە یاریزانی هەڵبژاردەی شەترەنجی كوڕانی عێراق دەكەن،جێگای ئاماژەكرنە پاڵەوانێتییەكە تا رۆژی 1-11-2023 بەردەوام دەبێت و لەلایەن یەكێتی‌ ناوەندی‌ شەترەنجی‌ عێراق بە هاوكاری‌ لقی سلێمانی یەكێتییەكە لە هۆڵی هۆتێل داوا ریكدەخرێت.
سەبارەت بەزانیاری وورد و هەنوكەییەكان ئەسعەد ئیسماعیل ئەندامی یەكێتییەكە و راوێژكاری هونەری سەرۆكی یەكێتی‌ شەترەنجی‌ عێراق راگەیاند و وتی: دەستپێكی پاڵەوانێتییەكە كاتژمێر 5ی ئێوارەی رۆژی چوارشەممە رێكەوتی 25-10-2023 دەبێت و سەرجەم یاریزانەكان لە ماوەی 8 رۆژ و بە 11 جەولە یاری پێكەوە یاری دەكەن و جگە لەوەش خاوەن پلەكانی یەكەم تا پێنجەمی ریزبەندی پاڵەوانێتییەكە دەبنە یاریزانی هەڵبژاردەی عێراق بۆ وەرزی 2023-2024 و بەشداری پاڵەوانێتییەكانی دەرەوەی عێراق دەكەن.
هەروەها ئەسعەد ئیسماعیل وتی : 12 یاریزانە بەشدارەكە كە 5 یاریزانیان كوردن، پێكهاتوون لە (حسێن عەلی/ هەولێر و زۆزگ سەڵاح، ئاكار عەلی‌، ئاریان عەلی‌، ئەحمەد جەزا/ سلێمانی و عەلی‌ لەیس/ موصل و ئەحمەد عەبدولستار، محەمەد لەتیف/ دیالە و ئەمین محەمەد، عەلی‌ فیڕاس/ بەغدا و عەباس حسێن/ كەربەلا و موعەزەز زاهیر/ دیوانیە).
ئەسعەد ئیسماعیل لەكۆتایی وتی : هیوای سەركەوتن بۆ تێكڕای یاریزانەكان دەخوازم و هیواشم وایە دەزگاكانی راگەیاندن و میدیاكارانی وەرزشی ئازیز گرنگێكی بەرفراوان بەم پاڵەوانیەتییە بدەن،چونكە یەكلاكەرەوەیە بۆ هەموو یاریزانانی بەشداربوو و هەنگاوێكی ناوازەشە سلێمانی دەبێتە چەقی میواندارییەكانی پاڵەوانیەتییە گرنگەكان.
Zagros
Zagros Nanakaly