چەوریی هەناو یان چەوریی سك Visceral fat، ئەو چەورییەیە كە لە قوڵایی ناو بۆشایی سكدا لە دەوری ئەندامەكانی وەكو گەدە، ڕیخۆڵە، جگەر كۆدەبێتەوە، كە بە چەوریی شاراوە ناوزەرد دەكرێت و ڕێژەی 10%ی كۆی چەوریی لەش پێك دەهێنێت. چەوریی هەناو بە خراپترین جۆری چەوریی لەش هەژمار دەكرێت، چونكە ماددەی كیمیایی زیانبەخش و هۆرمۆن دروست دەكات، كە هاندەرە بۆ تووشبوون بە گەلێك نەخۆشیی وەكو: نەخۆشیی دڵ، نۆرەی دڵ، نەخۆشیی شەكرەی جۆری دووەم، بەرزبوونەوەی پەستانی خوێن، جەڵتەی مێشك Stroke، شێرپەنجەی كۆڵۆن و ڕێكە و مەمك لە ئافرەتدا، هەروەها نەخۆشیی ئەلزهایمەر. ڕێژەی چەوریی سك پێوانە دەكرێت بە: یەكەم، پێوانەی چێوەی كەمەر كە ئەگەر لە 80 سم زیاتر بێت لە ئافرەت و لە 94 سم زیاتر بێت لە پیاواندا، واتە ڕێژەی چەوریی سك بەرزترە لە ئاستی ئاسایی. دووەم، پشكنینی وێنەگرتنی ڕەنینی موگناتیسی MRI كە لە خوێندنەوەی ژمارە یەك تا 12 بە ئاسایی هەژمار دەكرێت و خوێندنەوەی نێوان ژمارە 13-59 واتە ڕێژەی بەرزی چەوریی سك. هۆكارەكانی زیادبوونی چەوریی هەناو: زیاد وەرگرتنی وزە (كالۆری) لە خۆراك و كەمیی جووڵە یان مەشقی وەرزشی، تەمەنی وەستانی یەكجارەكیی سووڕی مانگانە لە ئافرەتدا، لە پیاویشدا تەمەن و جینەكان لەگەڵ خواردنەوەی ئەلكهول ڕۆڵیان هەیە لە زیادبوونی ڕێژەی چەوریی هەناودا.