ئەمڕۆ دووشەممە سعودیە کەوتنەخوارەوەی یەکێک لە فڕۆکە جەنگییەکانی ئێف ١٥ی بە هۆی هەڵەی تەکنیکییەوە ڕاگەیاند.

تورکی ئەلمالکی، وتەبێژی وەزارەتی بەرگری سعودیە ڕایگەیاند: فڕۆكەوانانی ئەم فڕۆكەیە کە لە ئەرکێکی مەشق و ڕاهێناندا بوون، ڕزگاریان بووە.

ئاماژەی بەوەشکرد: ئەم ڕووداوە ئێوارەی ڕۆژی یەکشەممە ڕوویداوە، لەو ماوەیەدا ئەم فڕۆکە جەنگییە ئێف ١٥یە لەکاتی ئەنجامدانی ئەرکێکی مەشقی ڕۆتینی لە ناوچەی مەشق و ڕاهێنانەکانی پەیوەست بە بنکەی ئاسمانی شا عەبدوڵڵا لە دەڤەری شەرقیە کەوتە خوارەوە.

ئەلمالکی ئاماژەی بەوەدا، کە تیمی ئەم فڕۆكەیە دوو ئەفسەر بوون، دوای بەکارهێنانی دوو کورسی فریاگوزاری ڕزگاریان بووە و ئاماژەی بەوەشکردووە، لەم ڕووداوەدا هیچ زیانێکی گیانی نەبووە.

گوتیشی، لیژنەیەکی لێکۆڵینەوە بۆ دیاریکردنی وردەکاری ئەم ڕووداوە پێکهێنراوە و دەستیان بە کارەکانیان کردووە.

 

 

گوڵان: سەردار خەلیل