بۆچی نەخۆشانی شەكرە تووشی بەرزبوونەوەی پەستانی خوێن دەبن؟ نەخۆشیی شەكرە كە بە باشی كۆنترۆڵ نەكرێت، ئەوا ئاستی بەرزی شەكری خوێن كاریگەریی نێگەتیڤ دەكاتە سەر دیواری خوێنبەرەكان و هاوسەنگیی شلەی لەش، هاوكات لەگەڵ كاریگەریی نەرێنی لەسەر فرمانی گورچیلەكاندا، بەمەشەوە پەستانی خوێن بەرزدەبێتەوە، كۆنترۆڵكردنی پەستانی خوێن لە نەخۆشانی شەكرەدا زۆر گرنگە بەمەبەستی كەمكردنەوەی ئەگەری تووشبوون بە جەڵتەی مێشك و نەخۆشیی دڵ و خوێنبەرەكان، هەروەها گرفت لە گورچیلە و چاودا، پسپۆران رێنمایی دەكەن كە پێویستە پەستانی خوێن لە نەخۆشانی شەكرەدا بە شێوەیەك كۆنترۆڵ بكرێت، كە هەرگیز لە 80/130 ملم جیوە زیاتر نەبێت. هەنگاوەكانی خۆپاراستن و كۆنترۆڵكردنی پەستانی بەرزی خوێن لە نەخۆشانی شەكرەدا: گۆڕینی ستایلی ژیان و هەڵبژاردنی خۆراكێكی هاوسەنگ و تەندروستی تایبەت بە نەخۆشانی شەكرە، هاوكات لەگەڵ كەمكردنەوەی خوێ و چەورییە تێرەكان و چەورییە نێوەندەكانTrans fats، ئەنجامدانی مەشقی وەرزشیی رۆژانەی مامناوەند بۆ ماوەی 30-45 خولەك لە زۆربەی رۆژەكانی هەفتەدا، دووركەوتنەوە لە جگەرەكێشان و خواردنەوە ئەلكهولییەكان، كۆنترۆڵكردنی كێشی زیادی لەش، زوو زوو بەسەركردنەوەی پێوانەی ئاستی شەكری خوێن و پەستانی خوێن بۆ دڵنیابوون لە كۆنترۆڵ كردنیان.