لە لێكۆڵینەوەیەكی نوێدا، توێژەرانی نەرویجی جەختیان لەمە كردووەتەوە كە ماددە كیمیاییەكانی ناو ئەو پلاستیكانەی بە شێوەیەكی باو بەكاردێن، وەكو بوتڵی پلاستیكی ئاوی خواردنەوە و قوتووی پلاستیكی خۆراك، لەوانەیە كە ببنە ئەگەری زیادبوونی كێشی لەش، ئەو پلاستیكانە تێكەڵاوێكی ماددەی كیمیایی لەخۆ دەگرن، كە هۆكارن بۆ زیادبوونی كێشی لەش و قەڵەوی. پلاستیك هەزاران ماددەی كیمیایی لەخۆدەگرێت كە هەندێكیان دەچنە ناو لەش و كاریگەریی دەكەنە سەر كرداری میتابۆلیزم Metabolism و كێشی لەش، پاش شیكردنەوەی نزیكەی 34 جۆری ئەو پلاستیكانەی كە لە ژیانی ڕۆژانەدا بەكار دەهێنرێن، وەك: قوتووەكانی ماست، بوتڵی ئاو و شەربەت و شلەمەنییەكانی دیكە، لەگەڵ ئیسفەنجی پاككردنەوەی چێشتخانەدا، دەركەوتوووە كە زیاتر لە 55،000 ئاوێتەی كیمیایی لەخۆ دەگرن، لەمانە 629 ماددەی كیمیایی كاریگەری دەكەنە سەر میتابۆلیزمی لەش (كرداری گۆڕینی خۆراك بۆ وزە) و كێشی لەش و خەزنكردنی چەوری، پێشتر ڕای زانایان وابوو كە زۆربەی ماددە كیمیاییەكانی پێكهاتەی پلاستیك جێگیرن، بەڵام لە توێژینەوەكاندا دەركەوتووە كە ژمارەیەكی زۆری ماددەی كیمیایی لە پلاستیكی جۆراوجۆردا جیا دەبنەوە و دەچنە ناو خۆراك و خواردنەوەكان، ئینجا كە دەگەنە لەش، دەبنە هۆی تێكدانی میتابۆلیزم و هاوسەنگیی هۆرمۆنەكان.