ئاژانسی فەرمیی دەنگوباسی عێراق لەسەر زمانی وتەبێژی وەزارەتی سەرچاوەكانی ئاو( عەلی رازی)بڵاوی كردۆتەوەن كە گوتوویەتی: دابەزینی ئاستێكی زۆری ئاو لە هەردوو ڕووباری دیجلەو فوڕات بەڕێژەی 50% هاتووەتە ئاراوە، ڕوونیشی كردەوە كە شاندێكی عێراق مانگی داهاتوو سەردانی توركیا دەكات.

 

رازی دووپاتی كردەوە كە ئەو دابەزینەی ئاستی ئاوە بە زۆری لە بەنداوەكانی دوكان و دەربەندیخان و سیروان و دیالەیە. ناوبراو باسی لە فاكتەرە دەرەكییەكان كرد كە لەپشت كەمیی ئاوە لە عێراق، جگە لە فاكتەرە تەكنیكییەكانی دیكە پەیوەست بە فراوانبوونی دەوڵەتان لە دروستكردنی بەنداوی كۆگاكردن و پرۆژە ئاودێرییەكان، هەروەها ئاماژەی بەوە كرد كە عێراق وەك دەوڵەتانی دیكەی جیهان كەوتۆتە بەر كاریگەریی كەشوهەوا لە ڕووی بەرزبوونەوەی پلەی گەرمی و قەتیسبوونی باران، ئەمەش خۆی لە خۆیدا هۆكارێكە بۆ كەمبوونەوەی گەیشتنی ئاو بە عێراق.

 

شایانی باسە لە مانگی حوزەیرانی ڕابردوودا شاندێكی عێراقی سەردانی توركیای كردبوو بۆ باسكردنی دۆسێی ئاو و بەسەركردنەوەی سەرچاوەكان و كۆگاكانی ئاو لە بەنداوی( ئەلیسۆ) كە توركیا لەسەر ڕووباری دیجلە دروستی دەكات.