پاش ئەوەی بۆ ماوەی چەند ساڵێك هێڵی گواستنەوەی پاسی شەقامی 100 مەتری لەنێو شاری هەولێر لە كاركردن وەستا بوو، جارێكی تر ئەو هێڵە لەرۆژی یەكشەممە( 22/8/2021) دەكرێتەوە. بەكاركەوتنەوەی هێڵی 100 مەتری بۆ شاری هەولێر لەكاتێكدایە فشارێكی زۆر لەسەر ئەو شەقامە هەیە و ژمارەیەكی زۆر گەڕەك و ناوچەی نوێی نیشتەجێبوون و فەرمانگەی لەسەرە. شایانی باسە شەقامی 100 مەتری دەكەوێتە نێوان هەر دوو شەقامی 40 مەتری و 120 مەتری
بەرێز سەلاح جەوهەر بەرێوەبەری گشتی گواستنەوە لە وەزارەتی گواستنەوەی و گەیاندنی حکوومەتی هەرێمی کوردستان رایگەیاند: پێش دوو ساڵ بڕیابوو كە هێڵی 100 مەتری بكرێتەوە و بۆ ئەو مەبەستە بانگەوازیش ئەنجامدرا، گەرچی بە دەمەوە هاتنی خاوەن پاسەكان بۆ كاركردن لەو هێلەوە سارد بوو، بەڵام ئێستا ژمارەیەكی زۆری پاسی هێڵەكە بڕیاریانداوە دووبارە دەست بە كاربكەنەوە و لەرۆژی یەكشەمەوە 22/8/2021ەوە دەستبەكاردەكەنەوە،. هەروەها بەڕێوەبەری گشتی گواستنەوە ئاماژەی بەوەشداوە هێڵی 100 مەتری لە هەردوو سایدی هاتن و چوونی شەقامی 100مەتر كاردەكەن و لەرێگای ئەو هێلەشەوە ئاسانكاری زۆر بۆ هاتوچۆی هاوڵاتیان و قوتابیان دەستەبەر دەبێت. هاوكات بەڕێوەبەری گشتی گواستنەوە وتی: شۆفێرانی هێڵەكە پاسی تازەتریان هێناوە ئەو ژمارەیەی كە بڕیاری كاركردنیان داوە ئەگەر توانای پڕكردنەوەی خواستیان نەبێت ئەوە بانگەوازێك دەكرێت بۆ ئەوەی ژمارەی پاس زیاتر بكرێت، هەروەها لە هەر گەڕەك و شوێنێك داواكاری خەڵك هەبێت بۆ كاركردنەوەی هێڵی گواستنەوە لە گەڕەك و شوێنەكان ئەوە ئێمە هێڵی تازەیان بۆ دەكەینەوە بۆ ئەوەی خزمەتی خەڵك بكرێت و تاوەكو بەهەبوون و فەراهەمكردنی هێلەكانی گواستنەوە خەڵك كەمتر ئۆتۆمبێلی تایبەت بەكاربهێنن و بەم هۆیەشەوە فشاریش لەسەر شەقامەكان كەمتر دەبێتەوە.
ئامادەكردنی: گوڵان/ سالح عومەر