ئەمڕۆ یەك شەممە كونسوڵخانەی ئەمریكا لە هەولێر سەرەخۆشی لە حكومەتی هەرێمی كوردستان كرد بە شەهیدبوونی ژمارەیەك پێشمەرگە لە ئەنجامی پەلامارەكەی تیرۆریستانی داعش بۆ سەر سەنگەری پێشمەرگە لە دەڤەری پردێ.

كونسوڵخانەی ئەمریكا لە بەیاننامەیەكدا ئاماژەی بەوە كردووە كە ویلایەتە یەكگرتووەكانی ئەمریكا هەردەم لەگەڵ هێزی پێشمەرگە دەوەستێت و پشتگیریان دەكات، هاوكات پشتیوانی لە هێزەكانی ئەمنیی عێراق دەكات لە پێناو ڕاونان و لەناوبردنی ئەم ڕێكخراوە تیرۆریستییە.

شایانی باسە لە ماوەی چەند ڕۆژی ڕابردوودا جموجۆڵ و هێرشەكانی ڕێكخراوی داعش لە عێراق لە هەڵكشاندایە، لە پەلامارەكەی بۆ سەر سەنگەری پێشمەرگەش دوێنێ شەو(شەممە) سێ پێشمەرگە شەهید بوون و دووانی دیكەش برینداربوون.







گوڵان- بەهادین جەلال