سەرۆک بارزانی و ژمارەیەک فەرماندەی ئەمریکی گفتوگۆ لەبارەی نوای ئارام دەکەن
لە ئیڤێنتەکەدا، کە ئەمڕۆ چوارشەممە 28-4-2021 بەشێوەی ئۆنڵاین بەڕێوە دەچێت، سەرۆک مەسعود بارزانی و ژمارەیەک فەرژماندەی باڵای ئەمریکی گفوتگۆ لەبارەی دروستکردنی نوای ئارام بۆ هەرێمی کوردستان، دەکەن.
بەشدارانی ئیڤێنتەکە:
- سەرۆک بارزانی
- هۆشیار زێباری، ئەندامی مەکتەبی سیاسیی پارتی دیموکراتی کوردستان
- بەیان سامی عەبدولڕەحمان، نوێنەری حکوومەتی هەرێمی کوردستان لە ئەمریکا
- جەیمس بەیکەر، وەزیری پێشووی دەرەوەی ئەمریکا (1989-1992)
- برێت مەکگۆرک، جێگری یاریدەدەری وەزیری بەرگری بۆ کاروباری رۆژهەڵاتی ناوەڕاست
- جەیمس جۆنس، فەرماندەی خانەنشینی سوپای ئەمریکا
- جەی گارنەر، فەرماندەی خانەنشینی سوپای ئەمریکا
- جۆن ئەبیزەید، فەرماندەی خانەنشینی سوپای ئەمریکا
رۆژی 5-4-1991، دوای نزیکەی مانگێک لە راپەڕینی گەلی کوردستان لە دژی رژێمی بەعس، ئەنجوومەنی ئاسایشی نێودەوڵەتی بڕیاری ژمارە 688ـی پەسەند کرد.
بەپێی بڕیاری ژمارە 688، وڵاتانی فەرەنسا، ئەمریکا و بەریتانیا هێڵی 36یان لە سنووری نێوان هەرێمی کوردستان و عێراق دیاری کرد، کە بە نوای ئارام بۆ هەرێمی کوردستان ناسرا و بەهۆیەوە رژێمی بەعس نەیتوانی چیتر لەو هێڵە بپەڕێتەوە و هێرش بکاتە سەر گەلی کوردستان.
بڕیارەکە لەکاتێکدا درا، کە فەرەنسا سەرۆکایەتیی خولی ئەوکاتی ئەنجوومەنی ئاسایشی نێودەوڵەتی دەکرد.
چوار وڵاتی ئەندامی هەمیشەیی ئەنجوومەنی ئاسایشی نێودەوڵەتی (فەرەنسا، ئەمریکا، یەکێتیی سۆڤیەت-رووسیای ئێستا- و بەریتانیا) و وڵاتانی ئەندامی ناهەمیشەیی ئەوکاتی ئەنجوومەنەکە (نەمسا، بەلجیکا، ساحلولعاج، ئیکوادۆر رۆمانیا و زائیر-کۆنگۆی دیموکراتیی ئێستا-) بە بەڵێ دەنگیان بە بڕیارەکە دا و وڵاتانی یەمەن، زیمبابۆی و کوبا دژی بڕیارەکە دەنگیان دا و وڵاتانی هیندستان و چینیش دەنگیان نەدا.
