بەپێی ئاماری ناوەندێکی مافی مرۆڤ لە ڕۆژهەڵاتی کوردستان، لە یەک ساڵی ڕابردوودا ١١ ڕۆژنامەنووسی کورد لەلایەن ناوەندە ئەمنییەکانی ئێرانەوە دەستگیر و دادگایی کراون.

بە پشتبەستن بە ئاماری ڕێکخراوی (هەنگاو) بۆ مافەکانی مرۆڤ، لە یەک ساڵی ڕابردوودا لانیکەم ١١ ڕۆژنامەنووس و چالاکوانی میدیایی لە ڕۆژهەڵاتی کوردستان لەلایەن ناوەندە ئەمنییەکانی حکوومەتی ئێرانەوە دەستبەسەر کراون، هەروەها دەیان کەسیش بۆ ناوەندە ئەمنییەکان بانگ کراون و لێپرسینەوەیان لەگەڵ کراوە.

بەپێی هەمان سەرچاوە هاوکات ٩ ڕۆژنامەنووسی کورد لەلایەن دەزگای دادوەریی حکوومەتی ئێرانەوە سەرجەم سزای ١٠ ساڵ و ٣ مانگ و ١ ڕۆژ بەندکران و ٩ ساڵ بەندکرانی هەڵپەسێردراویان بەسەردا سەپاوە.

ئێستا لە ڕۆژهەڵاتی کوردستان هیچ ڕۆژنامە و هەفتەنامەیەکی سەربەخۆ و بێلایەن چاپ و بڵاو ناکرێتەوە و چەندین گۆڤاری ئەدەبیی بێلایەن هەبوون کە هەموویان بەهۆی نەبوونی پشتیوانیی دارایی و خراپی ڕەوشی ئابوورییەوە ڕاگیراون و چاپ ناکرێن.

بەپێی زانیاریی میدیا خۆجێیەکانی ڕۆژهەڵاتی کوردستان تەنیا لە پارێزگای سنە زیاتر لە ٣٠ ڕۆژنامە و هەفتەنامە و گۆڤار لە ١٠ ساڵی ڕابردوودا داخراون، یان مۆڵەتیان لێ وەرگیراوەتەوە.













باسنيوز