بەڕێوەبەری گشتیی خانەنشینی هەرێمی كوردستان باس لە هەنگاوەكانی جێبەجێكردنی یاسای چاكسازی لە بواری خانەنشینی دەكات و دووپاتی ده‌كاته‌وه‌ ئەوانەی دوو مووچەی خانەنشینیان هەبوو مووچەكانیان راگیراوە و لە مووچەی پلەتایبەتەكانیشدا چاكسازی بەردەوامە.

ئه‌مڕۆ سێشه‌ممه‌ 13/4/2021، حازم ئیسماعیل، بەڕێوەبەری گشتیی خانەنشینی هەرێمی كوردستان لە وەزارەتی دارایی رایگەیاند: "لە یاسای چاكسازی لە مووچە و خانەنشینیدا، چوار ماددە پەیوەندیی بە خانەنشینییه‌وه‌ هەیە، كاری باشمان كردووە و تاوەكوو مانگی 9ی ئەمساڵ تەواوی ماددەكانی پەیوەست بە خانەنشینی تەواو دەكرێت".

ئاماژەی بەوەش دا: "ئەوانەی دوو مووچەی خانەنشینییان هەبوو، یان مووچەیەكی فەرمانبەری و مووچەیەكی خانەنشینییان هەبوو، مووچەكانیان راگیراون و لێكۆڵینەوەش لە دۆسیەكانیان دەستی پێكردووە".

حازم ئیسماعیل لە بارەی چاكسازی لە خانەنشینی پلەباڵاكانیش گوتی: ''چاكسازیی خانەنشینیی پلەباڵاكان بەردەوامە و لە ماوەی پێشوودا فۆڕمێك بۆ خانەنشینانی پلەی وەزیر و بریكاری وەزیر و راوێژكار و بەڕێوەبەری گشتی دابەش كرا، چاكسازی لە بەڕێوەبەرە گشتییەكان تەواو بووە، كە نزیكەی 750 كەس بوون و ناوەكان بۆ ئەنجوومەنی وەزیران بەرز كراونەتەوە و بۆیان ڕوون كراوەتەوە چەندیان نایاسایین و ئەوان بڕیاریان لێ دەدەن."

سه‌رنجی خسته‌ سه‌ر ئه‌وه‌ش، كه‌، دەست بە چاكسازیی لە دۆسیەی خانەنشینیی ڕاوێژكاران كراوە، "تا ئێستا سێ توێژی خانەنشینانمان تەواو كردووە، ئەوانیش دادوەران و بەڕێوەبەرانی گشتی و شارەزاكانن و ئێستاش لە قۆناغی چاكسازیی ڕاوێژكارانداین، دوای ئەوە دەست بە چاكسازیی ناوی بریكاری وەزیر و وەزیرەكان و ئەندامانی پەرلەمان و جێگری سەرۆكی پەرلەمان و سەرۆكی پەرلەمان و هەموو پلەباڵاكان دەكەین."

بەرپرسەكەی خانەنشینان ئاشكراشی كرد، پێش دەرچوونی یاسای چاكسازی، بەڕێوەبەرە گشتییەكان 80%ـی مووچەیان وەردەگرت، ئێستا دوای هەمواركردنەوە 60%ی مووچەیان پێ دەدرێت."

جەختیشی كردەوە، كه‌ چاكسازیی لیستی ناوی پلەباڵاكان و خانەشینانی شارستانی و سەربازی بەردەوام دەبێت تا چاكسازی لە هەموویان دەكرێت و دادپەروەری دێتە دی.













باسنیوز