وەزارەتی ئەوقافی هەرێمی کوردستان رایگەیاند، لە کۆبوونەوەی لیژنەی باڵای رووبەڕووبوونەوەی کۆرۆنا بڕیاری ئەوە دراوە کە لە مانگی رەمەزاندا مزگەوتەکان بکرێنەوە.

رۆژی یەکشەممە 11-04-2021 لیژنەی باڵای رووبەڕووبوونەوەی کۆرۆنا لە هەرێمی کوردستان کۆبووەوە. وەزارەتی ئەوقافی هەرێمی کوردستانیش دوای کۆبوونەوەکە راگەیێندراوێکی 13 خاڵی بڵاوکردەوە.

نەبەز ئیسماعیل، گوتەبێژی وەزارەتی ئەوقاف و کاروباری ئایینی هەرێمی کوردستان راگەیاند "لیژنەکانمان لە سەرتاسەری هەرێمی کوردستان، پارێزگاکانی [هەولێر، سلێمانی، هەڵەبجە و دهۆک] و ئیدارە سەربەخۆکانی گەرمیان و راپەڕین چاودێریی بینینی مانگ دەکەن و کەسانی پسپۆڕ و شارەزا لەنێو لیژنەکاندا هەن. لە وەزارەتی ئەوقافیش لیژنەیەکی باڵا هەیە و بڕیار لەبارەی یەکەم رۆژی مانگی رەمەزان دەدەن."

گوتەبێژی وەزارەتی ئەوقاف و کاروباری ئایینی هەرێمی کوردستان دەشڵێت "ئەگەر ئەمڕۆ بە بەڵگەوە مانگ لە ئاسمانی هەرێمی کوردستان بینرا ئەوا بێگومان بەیانی [دووشەممە 12-04-2021] یەکەم رۆژی مانگی رەمەزانە و ئەگەر نەشبینرا ئەوا دەبێتە تەواوکەری مانگی شەعبان."

وەزارەتی ئەوقافی هەرێمی کوردستان سەبارەت بە کردنەوەی مزگەوتەکان دەڵێت، "دوای کۆبوونەوەی لیژنەی باڵای بەرەنگاربوونەوەی کۆرۆنا بڕیاردرا بە کردنەوەی دەرگای مزگەوتەکان و سەرجەم شوێنە ئایینییەکان." لە مانگی رەمەزانیش بەپێی ئەم رێنوێنییانە دەرگای مزگەوتەکان دەکرێنەوە:




1. نوێژی عیشا و تەراویح لە 35 خولەک زیاتر ناخایەنێت.
2. هیچ جۆرە خواردن و خواردنەوەیێک بۆ بەربانگ لەناوەوە و دەرەوەی مزگەوت پێشکێش ناکرێت و قەدەخەیە.
3. دەستنوێژ لە ماڵەوە بگیرێت.
4. نوێژخوێن بە دەمامک و بەرماڵی تایبەتیی خۆیەوە دەچێتە ناو مزگەوت و پارێزگاری دووری نێوانیان بکات.
5. مامۆستای ئایینی خۆی پابەندی تەواو بە دەنگ بەرزکەرەوەکان دەکات و بە دەمامک و بەرماڵی تایبەت بە خۆیەوە دەچێتە نێو مزگەوت.
6. تەوقەکردن بە هەموو شێوەیەک قەدەخەیە.
7. لەبەر دەرگای هۆڵی نێژخوێنان تەنها دوو کەس دەبێت و ئامادەبێت لە یەکێک لەم چینانەی کە ئاماژەی پێکراوە (خۆبەخش یان فەرمانبەری حکومەت و یان فەرمانبەری سەر بە وەزارەت [خادم] یاخود بە هاوکاری دەزگای دیکەی پەیوەندیدار) بەمەبەستی دابەشکردنی دەماک و تەعقیمکردنی دەستی نوێژخوێنان.
8. هۆڵی ژنان دابخرێت.
9. مامۆستای ئایینی لە هەموو فەرزەکاندا، لە وتاردا هۆشیاری و رێنوێنی بدات بە نوێژخوێنان و جۆرێک لێپرسینەوە بکات لە وانەی پابەند نابن.
10. هەوڵبدرێت رایەخەکانی ناو مزگەوت هەڵبگیرێت.
12. وتاری هەیینی و نوێژی هەینی لەنیو کاژێر زیاتر ناخایێنێت.
13. بەشی پشکنین چاودێری مزگەوتەکان بکات و ئەو مزگەوتەی پابەند نەبوو بە رێنوێنییەکان دابخرێت.
rudaw -