لە ناو بەشێك لە هاووڵاتییاندا، دەنگۆیەك بڵاوبووەتەوە كە ئەوانەی پێكوته‌ی دژەكۆرۆنا وەردەگرن بۆ داهاتوو ئەو ڤاكیسنە كاریگەری نەرێنی لە جه‌سته‌ی ئەو كەسانە دروست دەكات، بەڵام وەزیری تەندروستیی حكوومەتی هەرێمی كوردستان ئەو دەنگۆیانە ڕەت دەكاتەوە.

ئەمڕۆ پێنجشەممە 1/4/2021. د. سامان بەرزنجی، وەزیری تەندروستیی حكوومەتی هەرێمی كوردستان ڕايگەیاند، ئەو دەنگۆیانەی باس له‌ كاریگه‌ریی نه‌رێنی پێكوته‌ی دژه‌كۆرۆنا ده‌كه‌ن بۆ داهاتوو، بێ زانیاری ده‌گوترێن و هیچ بنەمایەكی نییە، بەشێكی بەرچاو لە پزیشكان و كارمەندانی تەندروستیی خۆیان ئەو ڤاكیسنەیان بەكار هێناوە.

گوتیشی، ئەو دەنگۆیانەش كە بڵاوبوونەتەوە و دەڵێن ئەو كەسانەی كە ئەو ڤاكیسنە وەردەگرن تووشی گرانەتا و تا دەبن، ڕاست نییە.

هاوكات وەزیری تەندروستی ئەوەشی گوت: وەكوو وەزارەتی تەندروستیی حكوومەتی هەرێمی كوردستان لە ئێستا بەدواوە هاووڵاتییان بێ بەرامبەر دەتوانن لە نەخۆشخانە حكوومییەكان پشكنینی كۆرۆنا بكەن.











باسنيوز