بەری نیڤرۆ یا ئەڤرۆ یا رۆژا چارشەمبی ژوورا ئۆپەراسیونا پارێزگەھا دھۆکێ لدۆر بریارێن حکوومەتا ھەرێما کۆردستانێ و جێبەجێکرنا وان بریاران رۆنکرنەک بەلاڤکر.

د.عەلی تەتەر، پارێزگارێ دھۆکێ د کۆنگرەیەکێ رۆژنامەڤانی دا گۆت: "ئەڤرۆ مە کۆمبونەکا دیتر ئەنجامدایە بۆ جێەجێبونا وان بریاران ئەوێن ژلایێ لیژنا بلند یا روبروبونا کۆرونایێ ل ھەرێما کۆردستانێ بەلاڤ کرین و ھەمی ئەو بریارە دێ ب درۆستی ھێنە جێبەجێکرن".

گۆتژی:"دڤێت خەلک ھاریکار بیت و ھەر جۆرە سەرەدانەک بھێتە کێمکرن و خۆیایە بریار ئاشکرانە، دێ ب درۆستی ژلایێ مە ڤە ھێنە جێبەجێکرن و ھەر کەسێ پێگیر نەبیت، دێ ب دژواری ھێتە سزادان".

پارێزگارێ دھۆکێ دۆپات ژی کر: "سۆپاسیا خەلکێ پارێزگەھا دھۆکێ و ھەمی ھێزێن ئێمناھیێ دکەم بۆ ھاریکاریا وانا و ھەر کەسەکێ بێ ماسک ل ھەر جھەکێ ھەبیت بھێتە دیتن دێ ب ٢٠ ھزار دیناران ھێتە سزادان، ھیڤیە خەلک و شوفێر پێگیر و ھاریکار بن و ل رۆژانێن نەورۆژێ خەلک گەلەک دویر بوو ژ پێگیریکرنا رێنمایان لێ چەند رۆژە خەلک ھاریکار و پێگیر بوونە، لەورا دخازین ھەر کەسەک ب رێکا کار و شیانێن خۆ بۆ ھشیارکرنا جڤاکی کار بکەت و ھەر کەسێ ب ڤان رێنمایان پابەند نەبیت بێ دوو دلی دێ ھێتە سزادان".












باسنيوز