دوای ئەوەی شەوی رابردو پەرلەمانی عێراق بەهۆی ناکۆکی نێوان لایەنەکان لەسەر چەند برگە و مادەیەک، نەیتوانی دەنگ لەسەر پڕۆژەی بودجە بدات و کۆبونەوەی پەرلەمانیش بۆ رۆژانی داهاتو دواخرا، رێبەری رەوتی سەدر رایگەیاند، جارێکی دیکە بەهۆی ناکۆکییەکان بودجە پەسەندنەکرا و هۆشداری دەدەن لەوەی پێویستە بودجە لەوە زیاتر دوانەخرێت.

پەرلەمان بەهۆی ناکۆکییە سیاسیی، نەتەوەیی، حزبی و مەزهەبییەکانەوە نەیتوانی بودجە پەسند بکات

موقتەدا سەدر، رێبەری رەوتی سەدر لەپەڕەی فەرمی خۆی لەتویتەر پەیامێکی بڵاوکردەوە و رایگەیاند، جارێکی دیکە پەرلەمان بەهۆی ناکۆکییە سیاسیی، نەتەوەیی، حزبی و مەزهەبییەکانەوە نەیتوانی بودجە پەسند بکات و هۆشداری دەدەن لەوەی پێویستە بە زوترین کات بودجە پەسند بکرێت.

رێنمایی لایەنەکان دەکات ناکۆکییەکانیان وەلابنێن

ئاماژەی بەوەشکردوە، رێنمایی لایەنەکان دەکات ناکۆکییەکانیان وەلابنێن و لەزوترین کاتدا بودجە پەسەند بکەن.

کۆبونەوەی پەرلەمان بۆ پەسەندکردنی پڕۆژەیاسای بودجە بەهۆی ناکۆکی نێوان لایەنەکان دواخرا

شەوی رابردو ناسر هەرکی، ئەندامی فراکسیۆنی پارتی لەپەرلەمانی عێراق بە خەندان-ی راگەیاند، کۆبونەوەی پەرلەمان بۆ پەسەندکردنی پڕۆژەیاسای بودجە بەهۆی ناکۆکی نێوان لایەنەکانی شیعە بۆ کاتێکی دیکە دواخرا و چاوەڕێ دەکرێت لەرۆژانی داهاتودا وادەیەکی دیکە بۆ کۆبونەوە دیاریبکرێت.

لایەنەکان شیعە لەسەرپرسەکانی قەرز، گرێبەستەکان و دابەشکردنی داهات و پڕۆژەکان بەسەر پارێزگاکاندا ناکۆکن

ئاماژەی بەوەشکرد، کۆبونەوەی نێوان لایەنەکانی شیعە و جیاوازی و ناکۆکییەکانیان لەسەرپرسەکانی قەرز، گرێبەستەکان و دابەشکردنی داهات و پڕۆژەکان بەسەر پارێزگاکاندا بەردەوامی هەیە و بەوهۆیەش پەرلەمان نەیتوانی ئەمشەو دەنگ لەسەر پڕۆژەیاسای بودجە بدات.



خەندان