سیاسییەكی ڕۆژئاوای كوردستان: هەڕەشەكانی پەكەكە تەواوكەری جموجۆڵەكانی میلیشیاكانی رەبعوڵایە
ئازیزی، کە مامۆستای زانستی سیاسییە لە زانکۆی سەڵاحەدین، رای گەیاند: “100 رۆژ بەسەر دەسەڵاتی جۆ بایدن، سەرۆکی ئەمریکادا تێپەڕی، لە هەمان کاتدا چەندین میلیشیای شیعە لە عێراق، کۆتایی ئاگربەستیان لەگەڵ ئەمریکا لە عێراقدا راگەیاند”.
گوتیشی: “ئلەم رۆژانەدا میلیشیاکانی (رەبعوڵا)، خۆپیشاندانێکی چەکدارییان لە شەقامەکانی بەغدا کرد و هەڕەشەیان لە مستەفا کازمی و ئەمریکا و سعوودیە کرد، جەختیشیان کردەوە، کە رێ نادەن بەشی هەرێمی کوردستان لە بودجەی ساڵی 2021 بدرێ”.
ئازیزی ئاماژەی بۆ ئەوەش کرد: “زنجیرەکە لە شنگال تەواو دەبێ، کاتێ پەکەکە راگەیاندراوێک بۆ تەواوکردنی دەسەڵاتی ئێران بەسەر عێراق، لە رووی سیاسی و جوگرافییەوە دەردەکا”.
ئەو پسپۆرە کوردە دەپرسێ: “مانای چی دەگەیەنێ، کە هەزاران چەکداری سەر بە پەکەکە لە شنگال رێگری لە رێککەوتننامەیەکی شەرعیی ناوخۆیی عێراقیدا بکات بۆ گەڕانەوەی ئاوارەکان و نۆژەنکردنەوەی و هەڕەشەی سەربازی لە حکوومەتی عێراق و هەرێمی کوردستان بکات، ئەگەر ئامرازێک نەبێ بە دەستی ئێران؟ مانای چی دەگەیەنێ، کە ئەو حزبە گۆڕەپانی خۆی، کە کوردستانی باکوورە تا هەتایە بەجێ هێشتووە و لەپێناو ئەجیندای ئیقلیمی شەڕی هەرێمی کوردستان دەکا؟”.
ئاماژەی بۆ ئەوەش کرد: “راگەیاندراوەکەی پەکەکە ئەوە دووپات دەکاتەوە، کە بوونەتە هێزێکی سەربازی و بنکەیەکی پۆلیسی، بۆ پاراستنی ئەو رێڕەوەی ئێران بەناو خاکی عێراقدا بۆ گەیشتن بە سووریا و دابڕینی بەشێکی کوردستان و گرێدانەوەی بە عێراق و رێگریکردن لە جێبەجێکردنی مادەی 140 و رێگریکردن لە گەڕانەوەی ئێزدییەکان بۆ ناوچەکانیان، کە یەکێکە لە ئەرکەکانی پەکەکە بۆ پاکتاوکردنی ئایینی لە شنگال، بۆ بەرژەوەندیی ملیشیا شیعەکانی عێراق و ئێران”.
ئازیزی بەمە کۆتایی پێ دێنێ و دەڵێ: “ئێستا کاتی ئەوەیە، هەماهەنگی لەنێوان ئەمریکا، عێراق، کوردستاندا بکرێ، بۆ نەهێشتنی دەستی ئێرانی لە عێراق و سووریا و کشاندنەوەیان بۆ ناو خاکی خۆیان”. ئاماژەی بۆ ئەوەش کرد: “وەدەرنانی میلیشیا ئێرانییەکان و پەکەکە تەنیا لەسەر کات و ساتی خۆی ماوە”.
رۆژی پێنجشەمەی رابردوو، پەکەکە رایگەیاند، رەتی دەکاتەوە لە شنگال بکشێتەوە، هەڕەشەشی لە حکوومەتی عێراق کرد، کە رێگری لە بڵاوەپێکردنی هێزەکانیان دەکەن لە ناوچەکەدا.
باسنیوز
