له‌ ڕاگه‌یاندراوێكدا، بەڕێوەبەرایەتیی كۆنتڕۆڵی كارەبای هەرێمی كوردستان، ئاشكرای كرد به‌رنامه‌ی وه‌زاره‌تی كاره‌با بۆ رۆژانی نه‌ورۆز به‌ سه‌ركه‌وتوویی جێبه‌جێ كرا.

ئه‌مڕۆ شه‌ممه‌ 27/3/2021، بەڕێوەبەرایەتیی كۆنتڕۆڵی كارەبای هەرێمی كوردستان ڕاگه‌یاندراوێكی بڵاو كرده‌وه‌ و تێیدا ئه‌وه‌ خراوه‌ته‌ ڕوو، لە جەژنی نەورۆز و پشووەكاندا بە سەركەوتوویی بەرنامەی وەزارەتی كارەبا جێبەجێكرا و بەتێكڕا رۆژانە لە سەرووی 19 كاتژمێرەوە كارەبا بە هاوووڵاتیان درا.

له‌ به‌شێكی دیكه‌ی ڕاگه‌یاندراوه‌كه‌دا، ئه‌وه‌ بیر هێنراوه‌ته‌وه‌، كه‌ لە پەیامی جەژنی نەورۆزدا وەزارەتی كارەبا بە هاووڵاتیانی راگەیاندبوو؛ لە جەژنی نەورۆز و پشووەكانی سەری ساڵی نوێی 2721 كوردی بە پشتبەستن بە بەرهەمهێنانی 3400 مێگاوات كارەبا و لە رێگەی 7000 فەرمانبەری ئیشكگرەوە، 18 كاتژمێر كارەبا بە هاووڵاتیان دەدەین، لە ماوەی یەك هەفتەی رابردوودا وەزارەتی كارەبا توانی سەركەوتوانە ئەو بەرنامەیەی كە رای گەیاندبوو جێبەجێی بكات و بەتێكڕا لە سەرووی 19 كاتژمێرەوە كارەبا بدات و بەشێوەیەكی رێكوپێك بەسەر پارێزگاگانی كوردستاندا دابەشی بكات.

بەڕێوەبەرایەتیی كۆنتڕۆڵی كارەبای هەرێمی كوردستان، ئه‌وه‌شی خستووه‌ته‌ ڕوو، كه‌ تیمەكانی كۆنتڕۆڵی كارەبا بە پاڵپشتی و هاوكاریی تیمەكانی وێستگەكان و كرێكارانی سیانەكان 24 كاتژمێر لەخزمەتی هاووڵاتیاندا بوون.












باسنيوز