سه‌رۆك مه‌سعود بارزانى پێشوازیی لە باڵوێزی ژاپۆن لە عێراق كرد، لە دیدارەكەدا باڵوێزی ژاپۆن لە عێراق سەرسامیی خۆی بە سەقامگیری و پێشكەوتنەكانی هەرێمی كوردستان دەربڕی.

ئه‌مڕۆ سێشه‌ممه‌ 16/3/2021 لە سەلاحەددین، سەرۆك بارزانی پێشوازیی لە سوزوكی كوتارو، باڵوێزی ژاپۆن لە عێراق كرد، لە دیدارەكەدا باڵوێزی ژاپۆن لە عێراق سەرسامیی خۆی بە سەقامگیری و پێشكەوتنەكانی هەرێمی كوردستان دەربڕی و ئاماژەی بەوە دا، كە ئەو سەقامگیرییەی هەرێمی كوردستان یارمەتیدەرە بۆ ئەوەی ڕێكخراو و كۆمپانییە ژاپۆنییەكان بتوانن بە باشی و بێ گیروگرفت لە كوردستان كار و چالاكییەكانیان ئەنجام بدەن، هەروەها جەختیشی لەوە كردەوە كە وڵاتەكەی خوازیارە پەیوەندییەكانی لەگەڵ هەرێمی كوردستان لە بوارە جیاجیاكان بە تایبەت بواری كشتوكاڵ و كارەبا پەرە پێ بدات.

لای خۆیەوە سەرۆك بارزانی سوپاسی گەل و حكوومەتی ژاپۆنی كرد بۆ ئەو یارمەتییانەی پێشكەشی هەرێمی كوردستانیان كردووە و هیوای فراوانتربوونی پەیوەندییەكانی نێوان هەردوولای خواست.

پەیوەست بە بارودۆخی سیاسی و دوا پێشهاتەكانی ناوچەكە، هەردوولا جەختیان لە دیالۆگ و ڕێكاری ئاشتییانە بۆ چارەسەركردنی قەیران و كێشەكان كردەوە.












باسنيوز