له‌ شارى سلێمانى سێ شوێنى دروستكردنى گیادەرمان داخران كه‌ دوو له‌و شوێنانه‌ لەژێر ناوی شوێنی فرۆشتنی جلوبه‌رگ و ئەوی دیکەیان نووسینگەی خانووبه‌رە بووە.

له‌شكر حه‌مید، سه‌رۆكى لیژنه‌ هاوبه‌شه‌كانى قایمقامییه‌تى سلێمانى ڕاگه‌یاند: "دوای ئەوەی زانیاریمان پێگەیشت کە له‌ دوو شوێنی فرۆشتنی جلوبه‌رگ و نووسینگه‌یه‌كی خانووبه‌ره‌، گیادەرمان دەفرۆشرێت، هەڵمەتێکمان ئەنجامدا و ده‌ستمان به‌سه‌ر بڕێكی زۆر گیاده‌رماندا گرت".

گوتیشی: "گیاده‌رمانه‌كان بۆ كه‌مكردنه‌وه‌ی كێش به‌كارده‌هێنرێت، له‌میانەی لێكۆڵینه‌وه‌ش ده‌ركه‌وت كه‌ خۆیان ده‌رمانه‌كه‌ دروست ده‌كه‌ن و ناشزانرێت پێكهاته‌كه‌ی چییە و لە چی دروستکراوە و لە رێگەی په‌یجه‌كانی تۆڕه‌ كۆمه‌ڵایه‌تییه‌كانه‌وه‌ بە هاووڵاتیان دەفرۆشرا".

ڕوونیشیکردەوە کە به‌فه‌رمانی قایمقامی سلێمانی، ده‌ست به‌سه‌ر ته‌واوی گیاده‌مانه‌كاندا گیرا و هه‌رسێ شوێنه‌كه‌ش داخران و خاوەنەکانیشیان رێککاری یاساییان لەبەرامبەر دەگیرێتە بەر.
basnews -