رێڤەبەرێ مەسیحیان ل دهۆكێ: ژ بەر سەرەدانا پاپای دێ دیتنا دەولەتان بۆ هەرێما كوردستانێ هێتە گوهۆرین
مەعن شلێمون، رێڤەبەرێ كاروبارێن مەسیحیان ل پارێزگەها دهۆكێ سەر رێڤەبەریا گشتی یا كارۆبارێن مەسیحیان ل وەزارەتا ئەوقاف وكارۆبارێن ئایینی هەرێما كوردستانێ راگەهاند كو: "سەرەدانا پاپای ڤاتیكان رۆژەكا مێژویی بوو. ئەڤە چەندی دلخۆشیەك دناڤبەرا هەموو ئایین ونەتەوەیێن هەرێما كوردستانێ و عێراقێ دا دروستكریە. پێنگاڤەكا گەلەك جوان دەمێ پاپا هاتیە هەرێما كوردستانێ ئەڤە نیشانا ئاشتیێ و پێكڤە ژیانێ بوو ل كوردستانێ. ڤێ سەردانێ گەلەك دەنگڤەدان دووڤ خۆ ئێنان هەتا ژی دیتنا دەولەتان بۆ عێراق و هەرێما كوردستانێ دهێتە گوهۆرین، دێ پتر پشتەڤانی هەبیت دێ باشتر بیت وكەلتورێ پێكڤە ژیانێ دێ پتر بهێز بیت. د وێ عێراقا وێرانكری دا ژی دێ پێنگاڤ هێنە هاڤیتن بۆ پێكڤە ژیانێ. ئەم حەز دكەین باشتر بیت".
ئاشكەرا كر كو: "نۆكە د مووسلێدا بتنێ 70 خێزانێن مەسیحیان ڤەگەریاینە سەر جهێن خۆ كو هژمارا مەسیحیان ل مووسلێ گەلەك بوو لێ ئەڤرۆ كە بتنێ 70 خێزانێن مەسیحیان ل مووسل هەبن. ئەڤە رامانا وێ چەندێ دەت خەلكێ باوەری نینە ڤەگەرنە سەر جهێن خۆ ل مووسل".
باسنیوز
