پێنج ئافرەتی پەنابەری رۆژئاوای کوردستان لە کامپی دۆمیز کارگەیەکی شیرینییان کردووەتەوە، رێکخراوێکی خێرخوازی ئامێر و کەلوپەلی بۆ دابینکردوون و رۆژانە بەپێی پێویست شیرینی و کێک دروستدەکەن. بۆ ناساندنی خۆشیان، ئاهەنگێکیان سازکرد و بە ستران و موزیک سەرنجی خەڵکیان راکێشا.

کارگەکە یەکەم شوێنی کارکردنە کە لە کامپی دۆمیز ژنان کاری تێدا دەکەن و شیرینیی دروستدەکەن و دەفرۆشن، ئەو ژنانە تەمەنیان لەنێوان 27 تاوەکو 44 ساڵدایە و منداڵیان هەیە، داهاتی رۆژانەیان بەپێی کارە و لەنێوان 15 بۆ 25 هەزار دیناردایە.

یەکێک لەو ژنانە دەڵێت "دڵمان زۆر تەنگ بوو، ئێمە لە ماڵدا بووین و کارمان نەبوو، هاوژینەکانیشمان بێکارن، کردنەوەی ئەم کارگەیە بۆ ئێمە جێگەی دڵخۆشی بوو، داهاتێکە بۆ ماڵ و منداڵم، لێرەش لەگەڵ زۆر خەڵک ئاشنا دەبم و فێری کاری زیاتر دەبم".

یەکێکی دیکە لەو ژنانەی کە کارگەکەیان کردووەتەوە، ئاماژەی بەوە کرد "ئێمە پاقلاوە، کێک و بسکویتی رەنگاورەنگ دروستدەکەین، تاوەکو ئێستاش کارەکەمان بە باشی بەڕێوەچووە".

ئەوان بۆ ناساندنی بەرهەمەکەیان، ئاهەنگێکی بچووکیان سازکرد، بە ستران و موزیک سەرنجی خەڵکیان راکێشا، تاوەکو خەڵک دەمیان شیرین بکەن و بەرهەمەکەیان تاقیبکەنەوە. ئەو رێکخراوەش کە ئامێر و کەلوپەلەکانی بۆ دابینکردووە شەش مانگ چاودێرییان دەکات و بازاڕ بۆ بەرهەمەکەیان پەیدا دەکات.

ڤیان ئەحمەد، بەڕێوەبەری ئەو رێکخراوەی هاوکاریی ئەو پێنج ژنەی کردووە لە دابینکردنی ئامێر و کەلوپەلەکان دەڵێت، راهێنانیان پێکردوون لەوەی چۆن کاری خۆیان بەڕێوەببەن، لە هەوڵیشدان کە بەرهەمەکانیان ببەنە بازاڕ و ناوچەکانی پارێزگای دهۆک بۆئەوەی بیانفرۆشن.

بەپێی ئامارەکانی بەڕێوەبەرایەتیی کۆچ و کۆچبەران و وەڵامدانەوەی قەیرانەکان لە سنووری پارێزگای دهۆک، زیاتر لە 80 هەزار پەنابەری رۆژئاوای کوردستان لەنێو پێنج کامپدا نیشتەجێن.
rudaw -