ئەمڕۆ دووشەممە هەشتی مارس، بە بۆنەی ڕۆژی جیهانیی ئافرەتانەوە لە پارێزگای هەڵەبجە چەند چالاكییەكی جیاواز بەڕێوە چوو تێیدا ٥٠ ئافرەت خەڵات کراون.

ڕەزوان زەڵمی، سەرپەشتیاری یەكێك لە چالاكییەكان، ڕاگەیاند: "وەك ئەكادیمیای سمارت لە ڕۆژی جیهانیی ئافرەتاندا لەناو هۆڵی مۆنۆمێنتی هەڵەبجە چالاكییەكمان بەڕێوە برد و تێیدا خەڵاتمان بەخشییە ٥٠ ئافرەتی سنووری پارێزگای هەڵەبجە".

ڕوونیشی كردەوە: "ئەوە ئافرەتانەی كە ئەمڕۆ ڕێزلێنانمان پێشكەش كردن، ئەو خانمانە بوون كە لەگەڵ ئەوەی لەماڵەوە سەرقاڵن لە بازاڕەكانیش هەلی كاریان بۆ کەسانی دیەکش ڕەخساندووە و خاوەنیكارن، بۆیە ویستمان لەم ڕۆژەدا ئەم ڕێوڕەسمی ڕێزلێنانەیان بۆ ساز بكەین و بەشێک لە کار و پیشە دەستییەکانیان نمایش بکەین".

هاوكات هەر ئەمڕۆ و بە بۆنەی ٨ی مارسەوە، کۆلیژی یاسا و کارگێڕیی زانکۆی هەڵەبجە، پێشانگایەکی شێوەکاریمان بۆ خانمە شێوەكار (چرۆ سەلاحەدین)كردەوە. لە چالاکییەکی دیكەدا ڕێکخراوی نوێ بۆ پاراستنی ژینگە و مافەکانی ژنان لە هەڵەبجە، لەبەردەم زانكۆی هەڵەبجە، بە دروشمی (ژنان لە ڕێبەرایەتیدا بەدیهێنانی دواڕۆژێکی یەکسان لە جیهانی COVID 19)، چالاكییەك بەڕێوە چوو.






باسنيوز