بڕیار بوو دوو رۆژی دیکە فیلمی 09 لە سینەماکانی هەرێمی کوردستان پەخشبکرێت، بەڵام ئێوارەی ئەمڕۆ لە راگەیێندراوی وەزارەتی ناوخۆی هەرێمی کوردستان بڕیاری داخستنی سەرجەم هۆڵەکانی سینەما درا، لەو بارەیەوە بەڕێوەبەری پەیوەندییەکانی فیلمەکە دەڵێت: "هەوڵ دەدەین کە بە هەر شێوازێک بێت فیلمەکە پێشکەش بکرێت و رەزامەندیی لایەنە پەیوەندیدارەکان وەربگرین".

سۆران نەقشبەندی، بەڕێوەبەری پەیوەندییەکانی فیلمی 09 راگەیاند: "بڕیاری داخستنی سینەماکان شۆکی کردین، چونکە چەند رۆژێک پێش ئێستا لەگەڵ هەڤاڵ ئەبووبەکر، پارێزگاری سلێمانی لەبارەی فیلمەکە قسەمانکردووە و هیچ باسێکی داخستنی سینەما نەکراوە".

لەبارەی پەیڕەوکردنی رێکارەکانی خۆپارێزی لە پەتای کۆرۆنا، سۆران نەقشبەندی دەڵێت: "ئێمە رێز لە بڕیارەکانی وەزارەتی ناوخۆ دەگرین و ئەگەر توانیمان رەزامەندیی بڵاوکردنەوەی فیلمەکە وەربگرین، ئەوا ژمارەی کورسییەکان بۆ نیو هێندە کەمدەکەینەوە و دووری نێوان ئامادەبووان دەپارێزین".

سۆران نەقشبەندی ئاماژەی بەوەشکرد پەیوەندییان بە ئیدارە خۆجێییەکانی سلێمانی، هەڵەبجە و گەرمیان کردووە و ئەوانیش بەڵێنیان داوە کە هەوڵی ئەوە بدەن فیلمەکە پەخشبکرێت و دەیانەوێت دواتر قسە لەگەڵ پارێزگاری هەولێر و دهۆکیش بکەن.

لە پەڕەی فەرمیی فەیسبووکی فیلمەکە ئاماژە بەوەدراوە کە پەخشی فیلمەکە لە شارەکانی سلێمانی، کەرکووک، هەڵەبجە و گەرمیان بەردەوام دەبێت، بەڵام لە شاری هەولێر و دهۆک فیلمەکە رادەگیرێت تاوەکو بەرواری 10ـی ئادار و بڕیاری نوێی وەزارەتی تەندروستی.

بەڕێوەبەری پەیوەندییەکانی فیلمەکە لەبارەی ژمارەی ئەو بلیتانەی فرۆشراون گوتی: "تاوەکو ئێستا نازانین چەند بلیت فرۆشراوە، بەڵام هیوادارین فیلمەکە پەخشبکرێت و ئەوانەیشی چاوەڕێی پەخشی فیلمەکەن بتوانن سەیری بکەن."

09 فیلمێکی کوردییە لە دەرهێنانی بەختیار فەتاح کە ژانری فیلمەکە "ترسناکی تاوانبارانەیە". شوان عەتوف، ماهیر حەسەن، سیروان جەمال و ژاڵە رەسووڵ لە ئەکتەرە دیارەکانی فیلمەکەن.

ئێوارەی ئەمڕۆ وەزارەتی ناوخۆی هەرێمی کوردستان رێکارە نوێیەکانی بۆ رێگری لە بڵاوبوونەوەی کۆرۆنا راگەیاند و تێیدا هاتووە، هۆڵی سینەماکان لە گشت مۆڵ و بازاڕەکان دادەخرێن بە بەردەوامی لە تەواوی شار و شارۆچکەکان.

لەلایەکی دیکەوە هەر ئێوارەی ئەمڕۆ ژووری ئۆپەراسیۆنەکانی پارێزگای هەولێر راگەیێندراوێکی بڵاوکردەوە لە خاڵی شەشەمدا هاتووە، هۆڵه‌كانی سینەما لەگشت مۆڵ و بازاڕەکان بەتەواوی دادەخرێن. بەڵام تاوەکو ئێستا ژووری ئۆپەراسیۆنەکانی پارێزگای سلێمانی هەڵەبجە هیچ روونکردنەوەیەکیان لەو بارەوە بڵاونەکردووەتەوە.
rudaw -