ئهڤرۆ دهرگههێ سهرزێرێ دێ هێتە ڤهكرن
شینوار سادق، پهیڤدارێ دهرگههێ سنۆرى یێ سهرزێرێ دیار كر: "بهریا 10 رۆژان وهزارهتا ناڤخۆ یا حكومهتا ههرێما كوردستانێ بریارا ڤهكرنا دهرگههێ سنورى یێ سهر زێرێ دابوو، مه وهكه رێڤهبهریا دهرگههى ههر بلهز ههمى ئامادهكارى بۆ ڤهكرنا دهرگههى كربون و ئهم بهرههڤ بووین ب ڤهكرنا دهرگههى، لێ ژ لایێ توركیا ڤه دهرگههێ ناڤبرى نههاتبو ڤهكرن، لهورا ژ وێ رۆژێ هاتن و چوونا خهلكێ و گهشتیاران نههاتبو ئهنجام دان و ئهڤرۆ ب فهرمى دهرگههێ سنورى یێ سهر زێرێ ژلایێ ههرێما كوردستان و وهلاتێ توركیا ڤه هات ڤهكرن و هاتن وچوونا خهلكێ هات ئهنجام دان".
پهیڤدارێ دهرگههێ سنۆرى یێ سهرزێرى دۆپات ژى كر: "نها هاتنوچوونا خهلك و گهشتیاران ل ڤی دهرگههێ سنوری یێ ههرێما كوردستانێ و وهلاتێ توركیا بهردهوامه و ژ ههردوو لایان ڤه پێشوازیا خهلكێ دهێت كرن. ژ لایێ ههرێما كوردستانێ ڤه تیمێن ساخلهمیێ پشكنینا خهلكێ دكهن بۆ وێ چهندێ بزانین ههر كهسێ دهێته ههرێما كوردستانێ ههلگرێ پهتایا كۆرونایێ یه یان نه".
گۆت ژى: "بهریا پهتایا كۆرونایێ رۆژانه هزاران كهسان هاتن و چوون ل ڤى دهرگههى ئهنجام دایه لێ ژ ئهگهرێ پهتایا كۆرونایێ بۆ دهما 11 ههیڤان ئهڤ دهرگههه هاتبو گرتن و ئهڤرۆ ب فهرمى جارهك دى كهفته خزمهتا خهلكێ ههرێما كوردستان و وهلاتێ توركیا دا".
جهێ ئاماژهدانێیه، دهرگههێ سنۆرى یێ سهر زێرێ ل رێكهفتێ 6/5/2015 ب فهرمى ژلایێ حكومهتا ههرێما كوردستانێ هاتیه ڤهكرن كۆ دهرگههێ ههڤسنورێ ههرێما كوردستان و وهلاتێ توركیا یه، دكهڤیته سنورێ قهزا ئامێدیێ و ل باكورێ كوردستانێ ههڤسنورێ پارێزگهها جۆلهمێرگێیه.
باسنیوز
