پەیڤدارێ‌ رێڤەبەریا بەرەڤانیا باژێری ل پارێزگەها دهۆكێ‌ دیار كر كو بۆ ماوێ‌ دوو رۆژان ئاگر بەربوو چیایێ‌ شكەفت هندیانێ‌ ل پارێزگەها دهۆكێ‌ و چەند بنگەهێن ئاگرڤەمراندنێ‌ ل دهۆكێ‌ بەشداری‌ دكۆنترۆل كرنا ئاگرێدا كرن.

بێوار عەبدولعەزیز، راگەهاند كو: "د روودانا ئاگرێ‌ چیایێ‌ شكەفت هندیانێ‌ دا ل دهۆكێ‌ پتر ژ هزار دونەمێن پیش و پەلاخێ‌ و پاوانێ‌ گوندی‌ و داروبارێن چیایێ‌ شكەفت هندیانێ‌ هاتنە سۆتن. ل شەڤا بۆرێ‌ ئاگرێ‌ هاتیە كۆنترۆل كرن ئەوژی پشتی بۆ ماوێ‌ دوو رۆژان تیمێن سێ‌ بنگەهێن بەرەڤانیا باژێری، بنگەهێ‌ بەروشكێ‌ و بنگەهێ‌ نزاری و بنگەهێ‌ مالتایێ‌ بەشدارێ‌ دكۆنترۆل كرنا ڤێ‌ روودانا ئاگری‌ دا كرن چونكو ئاگرەكێ‌ مەزن بوو بەربوو ئاقار و چیایێ‌ شكەفت هندیانێ‌ ل شەڤا بۆرێ‌ دا ئاگر‌ هاتیە كۆنترۆل كرن".

ئاشكەرا كر كو: "هێشتا ئەگەرێن سۆتنا ئاقار و چیایێ شكەفت هندیانێ‌ ئاشكرا نەبوویە. ئەڤ سالە رێژەكا زۆر روودانێن سۆتنا پیش و پەلاخێ‌ وچیایێن پارێزگەها دهۆكێ‌ چێبووینە. ئەڤ ئەردێ‌ هاتیە سۆتن هەموو پاوان و دارستان بوویە".











باسنیوز