سەنتەرێک لە سلێمانی خاوەن پێداویستییە تایبەتەکان دەخاتە سەر کار
وەستا فەرید، چوار ساڵ لەمەوبەر لە مەڵبەندی راهێنانەوەی خاوەن پێداویستییە تایبەتەکانی سلێمانی ناوی خۆی تۆمارکردووە و بۆ ماوەی پێنج مانگ بێبەرامبەر خولی دارتاشی بینیوە و فێری پیشەکە کراوە، هەر لەسەر ئەرکی ئەو سەنتەرەکە کارگەیەکی بچوکی بە هەموو پێداویستییە پیشەییەکانەوە بۆ کراوەتەوە.
وەستا فەرید کەریم کە سوودمەندی سەنتەری راهێنانەوەی ئیمێرجنسیە قسەی بۆ رووداو کرد و گوتی، "لەساڵی 2001ـەوە قاچی دەستکرد بەکاردێنم و لە ساڵی 2016ـەوە چوومە خولی سەنتەری راهێنانەوەی ئیمێرجنسی و بۆ ماوەی پێنج مانگ لە خولی فێربوونی دارتاشی بووم. ئێستا بوومەتە وەستایەکی باش، دووکانیان بۆ داناوم و زۆر دڵخۆشم کە دەتوانم بژێوی خێزانەکەم دابین بکەم".
سەنتەرەکە هەلی کاری بۆ زیاتر لە 600 خاوەن پێداویستیی تایبەت رەخساندووە و زیاتر لە 386 دووکانی پیشەگەری لە بوارەکانی (دارتاشی، پلاستیک، ئەلەمنیۆم، خەیاتی و سەراجی) و هەندێک کاری دیکە رەخساندووە.
ئەو سەنتەرە لەساڵی 1998ـەوە لە سلێمانی دامەزراوە و لەو کاتەوە دەست یان قاچ یان پاڵپشتیی دەستکردی بۆ شەش هەزار و 500 خاوەن پێداویستیی تایبەتی دروستکراوە و هەموو رۆژێکی هەفتەش بەشێک لەو خاوەن پێداویستییە تایبەتانە سەردانیان دەکەنەوە بۆ چاککاری و توندوتۆڵکردنەوەی دەست یان قاچە دەستکردەکانیان.
سەنتەرەکە سەر بە وەزارەتی تەندروستیی هەرێمی کوردستانە و لەلایەن رێکخراوی ئیمێرجنسیی ئیتاڵییەوە پاڵپشتی دارایی دەکرێت.
فارس حەمە، بەڕێوەبەری مەڵبەندی راهێنانەوەی ئێمرجنسییە لە سلێمانی، بە رووداوی راگەیاند، 22 ساڵە سەنتەرەکەیان بەردەوامە لە کار و لە دوو بەشی سەرەکیدا کار دەکەن، ئەوانیش دروستکردنی دەست و قاچ و پاڵپشتی دەستکرد و دۆزینەوەی کارە بۆ ئەو کەسانەی کە پەلەکانیان بۆ دروستدەکەن، "بودجەیەکی تایبەتیشمان بۆ ئەو کارانە بۆ دیاریکراوە".
مەحموود عەبدوڵڵاش ماوەی 24 ساڵە پێی چەپی بەهۆی مینەوە لەدەستداوە و لەو سەنتەرە چەند جارێک پێی دەستکردی بۆ دروستکراوە. ئەو لە ساڵی 1996ـەوە پێی چەپی بەهۆی مینەوە لە شارۆچکەی پێنجوێن لەدەستداوە و دواتر بەهۆی دروستکردنی پێی دەستکردەوە توانیویەتی، بە گوتەی خۆی "وەکو پێشتر دەست بە ژیان بکەمەوە".
لە سەرانسەر عێراق و کوردستان ژمارەیەکی زۆر لە خاوەن پێداویستییە تایبەتەکان سوودیان لەو سەنتەرە بینیوە، ئەوە جگە لەوەی لەگەڵ رەخساندنێکی هەر هەلێکی کاردا بۆ خاوەن پێداویستییەکی تایبەت خێزانێکیش سودمەند دەبن.
rudaw
