مەسروور بارزانی، سەرۆکوەزیرانی هەرێمی کوردستان لە هەڤپەیڤینی لەگەڵ بەشێک لە میدیاکانی هەرێمی کوردستان باسی پرۆسەی چاکسازی، مەترسییەکانی سەر هەرێمی کوردستان و مووچە و بودجەی کرد. لە وەڵامی پرسیاری تۆڕی میدیایی رووداو لەبارەی دابەشکردنی مووچە بەبێ لێبڕین گوتی، "ناتوانم بڵێم کەی دەتوانین مووچە بەبێ لێبڕین دابەشبکەین".

هەوراز گوڵپی، پێشکێشکاری تۆڕی میدیایی رووداو لە مەسروور بارزانی، سەرۆکوەزیرانی هەرێمی کوردستانی پرسی، حکومەت کەی دەتوانێت لەکاتی خۆی مووچە بەبێ لێبڕین دابەشبکات؟ لە وەڵامدا، سەرۆکوەزیرانی هەرێمی کوردستان گوتی "ئەگەر حکومەتی عێراق ئیلتیزاماتی خۆی بەرامبەر دابینکردنی مووچە جێبەجێ بکات کە پێشتر بەڵێنیان داوە، حکومەت دەتوانێت ئەو وەختە مووچە وەکو خۆی دابەشبکات". بەڵام ئێستا ناتوانێت بڵێت کەی و چ مانگێک دەتوانن بەبێ لێبڕین مووچە دابەش بکەن.

مەسروور بارزانی ئاماژەی بەوە کرد، ئەگەر ڤایرۆسی کۆرۆنا نەمێنێت و نرخی نەوتیش بگەڕێتەوە باری ئاسایی، ئەوا ئومێدەوارن بە داهاتی ناوخۆ مووچە وەکو جاران (بەبێ لێبڕین) دابەش بکەن.

لەبارەی دواکەوتنی مووچەوە، سەرۆکوەزیرانی هەرێمی کوردستان رایگەیاند، هۆکاری دواکەوتنی مووچە ئەوە بووە کە بودجەیان نەبووە.

تەمەنی کابینەی حکومەتی هەرێمی کوردستان 13 مانگە، سەرۆکوەزیرانی هەرێمی کوردستان دەڵێت، لەو ماوەیەدا "12 مووچەمان داوە". گوتیشی "کەسێکیش بیەوێت راستییەکان بزانێت، هەموو ئەو شتانەی بۆ دەردەکەوێت".

سەبارەت بە لێبڕینی 21%ـی مووچەی مووچەخۆران، سەرۆکوەزیرانی هەرێمی کوردستان دەڵێت "ئەوە خۆگونجاندنە لەگەڵ دۆخەکە و چاکسازیی نییە". هۆکارەکەیشی بۆ ئەوە گەڕاندەوە کە حکومەتی عێراق سێ مانگ بودجەی نەناردووە و داهاتی ناوخۆش بەهۆی ڤایرۆسی کۆرۆناوە کەمی کردووە.

مەترسی لەسەر هەڵوەشاندنەوەی قەوارەی هەرێمی کوردستان نییە

یەکێک لە پرسیارەکان کە ئاراستەی سەرۆکوەزیرانی هەرێمی کوردستان کرا، مەترسیی هەڵوەشاندنەوەی قەوارەی هەرێمی کوردستان، مەسروور بارزانی گوتی، "پێم وانییە مەترسی لەسەر تێکچوونی قەوارەی هەرێمی کوردستان هەبێت، بەڵکو گەورەترین کێشە دووبەرەکی و ناتەبایی نێو لایەنەکان و خەڵکی کوردستانە.. ئەگەر لەنێوخۆ خەڵک و لایەنەکان تەبابن لەگەڵ یەک، هیچ هێزێک ناتوانێت قەوارەی هەرێمی کوردستان تێکبدات".

رووداو: بۆچی لەگەڵ حکومەتی عێراقی تەنیا لەسەر سێ مانگ رێککەوتن؟ ناکۆکی سەرەکی ئێوە لەسەر بەڕێوەبردن و داهاتی دەروازە سنوورییەکانە؟

سەرۆکوەزیرانی هەرێمی کوردستان رایگەیاند، لەگەڵ حکومەتی عێراق لەسەر خەتن بۆ ئەوەی بگەن بە ئەنجامێک، کێشەکان تەنیا دەروازەی سنووریی نین. "کێشەی هەرێمی کوردستان لەگەڵ عێراق تەنیا مووچە نییە، "کێشەی ئێمە لەگەڵ رژێمەکانی پێشوو مووچە نەبووە، حکومەتی بەعسیش پێشتر مووچەی داوە، بەڵکو داواکردنی ماف، ئازادی، یەکسانی و کیان بووە. بەڵام بەداخەوە ئێستا هەموو شتێکیان لە مووچەدا کەمکردووەتەوە".

بە گوتەی سەرۆکوەزیرانی هەرێمی کوردستان، دەسەڵاتی دەستووری کێشەی سەرەکی نێوان هەولێر و بەغدایە و "ئێمە لە هیچ مافێکی دەستووریی هەرێمی کوردستان خۆش نابین. ئەوەی داکۆکیشی لێدەکەین بۆ ئەوەیە پارێزەری ئەو مافە بین". لێکتێگەیشتنی هەردوولاش دەبێت لەسەر بنەمای دەستوور بێت.
لەبارەی گەڕانەوەی پێشمەرگەش بۆ ناوچە دابڕێندراوەکان، سەرۆکوەزیرانی هەرێمی کوردستان ئاماژەی بەوە کرد، قسەی زۆریان لەگەڵ حکومەتی عێراق کردووە و ئەو پرسەش دوو بەشە، یەکەمیان: چارەسەرکردنی ناوچە دابڕێندراوەکان لەڕێگەی ماددەی 140ـی دەستووری کە ئەوەش بە سێ قۆناخی جیاوازە، "بەداخەوە حکومەتی فیدراڵی کەمتەرخەمبووە لە جێبەجێکردنی دەستوور نەک هەرێمی کوردستان".

خاڵێکی دیکە، ئەو گۆڕانکارییە ئەمنییەیە کە لەو ناوچانە روویانداوە، سەرۆکوەزیران گوتی "لەگەڵ حکومەتی عێراق رێککەوتنێکیان کردووە بۆ ئەوەی لەگەڵ حکومەتی عێراق بگەنە ئەنجامێک بۆ پڕکردنەوەی ئەو بۆشاییە ئەمنییانەی ناوچەکە تاوەکو داعش سوودیان لێنەبینێت.. بەو پێیەش پێشمەرگە و سوپای عێراق ئەو ناوچانە دەپارێزن".

کازمی تێگەیشتنی باشە بۆ ماددەی 140

سەرۆکوەزیران گوتی، تێگەیشتنی مستەفا کازمی، سەرۆکوەزیرانی عێراق بۆ چارەسەرکردنی کێشەی ناوچە دابڕێندراوەکان لەڕێگەی ماددەی 140ـەوە باشە.

مەسروور بارزانی: عێراق هۆکاری دواکەوتنی مووچەیە

سەرۆکوەزیرانی هەرێمی کوردستان پەیامێکیشی بۆ ئەو کەسانە نارد کە بە گوتەی خۆی "بانگەشەی پارێزگاری لە مافەکانی کوردستان لە بەغدا دەکەن" رەخنەکانیان لە بری حکومەتی هەرێمی کوردستان ئاراستەی حکومەتی فیدراڵی بکەن، چونکە ئەوان هۆکاری نەناردنی مووچەکە بوون".

کێشەی ئێمە لەگەڵ رژێمەکانی پێشوو مووچە نەبووە، حکومەتی بەعسیش پێشتر مووچەی داوە، بەڵکو داواکردنی ماف، ئازادی، یەکسانی و کیان بووە.
مەسروور بارزانی: لە کاری هەموو وەزیرەکان رازیم

سەرۆکوەزیرانی هەرێمی کوردستان دەڵێت، حکومەتێکی هاوپەیمانییان لەگەڵ گۆڕان و یەکێتی پێکهێناوە، "بەڕاشکاوی دەیڵێم، ئەو برادەرانەی بەشدارن لە حکومەت تیمێکی زۆر گونجاون و کاری باشمان پێکەوە کردووە و بڕیارەکانمان بە رێککەوتن دەدرێت".

لەبارەی ئەدای وەزیرەکانی کابینەی نۆیەم، مەسروور بارزانی گوتی "ئەدای وەزیرەکان بەبێ جیاوازی و لە هەر لایەنێکی سیاسی بن، خۆم زۆر لێیان رازیم... ئەوانەی لە کابینەکەدان، من پێم وایە زۆر باش و سەرکەوتوون".



rudaw