بەمەبەستی کارئاسانی و کەمکردنەوەی ئەرک و خەرجیی قوتابیان، وەزارەتی خوێندنی باڵا و توێژینەوەی زانستیی حکوومەتی ھەرێمی کوردستان، گواستنەوە و دابەزاندنی بەشێکی زانکۆ بۆ بەشێکی دیکە لە قوتابیان دەکاتە ئەلیکترۆنی.

وەزارەتی خوێندنی باڵا و توێژینەوەی زانستی ئەمڕۆ دووشەممە ١٧ / ٨ / ٢٠٢٠ بڵاوی کردەوە کە: لە دەستپێشخەرییەکی نوێدا بەمەبەستی ئەنجامدانی کارئاسانی زیاتر بۆ ئەو خوێندکار و قوتابیانەی لە نێوان زانکۆکان دەیانەوێت پرۆسەی گواستنەوە و دابەزاندن ئەنجام بدەن و وەک سەلامەتی و پاراستنی تەندروستییان، وەزارەتی خوێندنی باڵا تەواوی پرۆسەکە بە ئەلیکترۆنی دەکات.

بەپێی نووسراوەکە: پلاتفۆڕمی تایبەت بە گواستنەوەو دابەزینی خوێندکاران/ قوتابیان بۆ ساڵی خوێندنی (٢٠٢٠-٢٠٢١) بە ھەماھەنگیی ناوەندی وەرگرتن لە وەزارەتی خوێندنی باڵا و توێژینەوەی زانستی لەگەڵ تۆماری گشتی و بەشی (IT )ی زانکۆی پۆلیتەکنیکی سلێمانی ئامادە کراوە و ئێستا سەرجەم ئەو خوێندکار و قوتابییانەی دەیانەوێت پرۆسەی گواستنەوە لە نێوان زانکۆکان و پرۆسەی (دابەزاندن) لە نێوان بەش و کۆلێژەکان ئەنجام بدەن، پێویست ناکات بەھۆی بارودۆخی بڵاوبونەوەی ڤایرۆسی کۆرۆنا سەردانی وەزارەت یان زانکۆکان بکەن، دەتوانن بەشێوەی ئەلیکترۆنی و لەڕێگەی لینکی (https://www.mhe-studentaffairs.com/student/index.php) ئەنجام بدەن.

بەپێی ڕاگەیەندراوەکە، ئەو قوتابی و خوێندکارانەی خوازیاری پرۆسەی گواستنەوە و دابەزاندنن، پێویستە ڕێنماییەکانی گواستنەوە و دابەزاندن بە باشی بخوێننەوە بۆ ئەوەی ئاشنای تەواوی مەرج و ڕێنماییەکان بن.













باسنيوز