زانیاریێن نوو ل سەر كەرەنتینكرنا كەمپا كەبەرتوو ل دهۆكێ
مەنال محەمد فوئاد، رێڤەبەرا كۆچ و كۆچبەرا و رێڤەبەرا بەرسڤدانا قەیرانا ل پارێزگەها دهۆكێ دیار كر كو: "ل رۆژا 13/8/2020ێ 13 حالەتێن كۆرۆنایێ ل كەمپا كەبەرتوول دهۆكێ هاتنە تۆماركرن. ئەڤرۆ 16/8/2020ێ رەوشا 13 تووشبوویێن كۆرۆنایێ باشە هەروەسا ژی بەركەفتیێن وان هەموو هاتبوونە كەرەنتینكرن رەوشا وان ژی باشە. دووڤ زانیاریان ئەنجامێن پشكنینا هندەك بەركەفتیێن تووشبوویێن كۆرۆنایێ ل كەمپێ، نێگەتیف دەرچووینە لێ هەتا ئەڤرۆ كەمپا كەبەرتوو یا كەرەنتینكریە".
ئاشكەرا كر كو: "بتنێ بۆ گەهاندنا ئاهێن خوارنێ و سازیێن ساخلەمیێ و رێكخراوان رێك دهێتە دان وەكو دیتر بۆ وەلاتیان رێك پێ ناهێتە دان هاتن چوونێ بكەن پێخەمەت پاراستنا ژیانا ئاوارێن ناڤ كەمپێ دا. هیڤیدارن ئاوارە دگەل مە هەڤكار بن و پێگریێ رێنمایان بكەن بێ كارێن زۆر گرنگ ژمال نە دەركەڤن وناڤ خیڤەتێن خۆ دا بمینن".
ل پارێزگەها دهۆكێ 21 كەمپێن ئاواران و پەنابەران هەنە ژوانا ژی 16 كەمپ یێن ئاوارانە و پێنچ كەمپ ژی یێن پەنابەرانە. زێدەتر ژ 80% خەلكێ شنگال دناڤ كەمپێن ئاوارانە دانە ل سنۆری پارێزگەها دهۆكێ. دووڤ ئامارێن ساخلەمیا دهۆكێ ژی نۆكە 44 ئاوارە بەركەفتیێن تووشبوویێن كۆرۆنایێ نە دناڤ جهێن كەرەنتینان دانە.
باسنیوز
