كەمال كلیچدارئۆغڵو سەرۆكی جەهەپە، لە دوا كۆنگرەی پارتەكەیدا كە دوو هەفتە پێش بەسترا،، ئاماژەی دا پێویستە لە توركیا كێشەی كورد چارەسەر بكرێت، بۆیە جەهەپە خەریكی نووسینی راپۆرتێكی گرنگە بۆ چۆنیەتیی چارەسەركردنی كێشەی كورد و لەسەر داوای كلیچدارئۆغڵوش راپۆرتەكە چەند رۆژێكی تر ئامادە دەبێت.

لە ساڵی ١٩٨٩ جەهەپە راپۆرتێكی لەبارەی كێشەی كورد لە توركیا ئامادە كرد و بڵاوی كردەوە و ئەوكاتیش گوتی با كێشەی كورد لەناو پەرلەمانی توركیا چارەسەر بكرێت،بەڵام هیچ ئەنجامێكی نەبوو، ئەمجارەشیان دووپاتی دەكاتەوە كە پێویستە لەناو پەرلەمانی توركیا كێشەی كورد چارەسەر بكرێت.

رۆژنامەی (بیرگون)ی توركی بڵاوی كردووەتەوە، كلیچدارئۆغڵو داوای كردووە پەلە بكرێت لە تەواوكردنی راپۆرتی چارەسەركردنی كێشەی كورد لە توركیا، هەروەها پێیانی گوتووە دویاتی بكەنەوە كە پەرلەمان مەرجەعە بۆ چارەسەركردنی ئەو كێشەیە. راپۆتەكەش لەژێر ناونیشانی (٢٢ پرسیار و ٢٢ وەڵام دەبێت).

سەزگین تانریكولو ئەندام پەرلەمانی جەهەپە، لە لێدوانێكیدا بۆ رۆژنامەی بیرگون ئاشكرای دەكات كە راپۆرتەكەی جەهەپە لەلایەن تیمێكی شارەزاوە دەنووسرێتەوە، كە چەند ئەندام پەرلەمانێك و چەند كەسێكی یاسایی ئەندامن تێیدا و لە ماوەیەكی نزیكدا پێشكەشی پەرلەمانی توركیای دەكەن.

رەخنەیەكی زۆر لە جەهەپە دەگیرا، بەوەی ئەو هەموو فشارەی لەسەر كورد هەبووە، جەهەپە بێدەنگیی هەڵبژاردووە، بۆیە كلیچدارئۆغڵو دەیەوێت وەڵامی ئەو رەخنانە بداتەوە.

ئەوەی زۆر گرنگە لە راپۆرتەكەدا، جەهەپە بۆ یەكەمجارە لە مێژووی توركیادا داوا دەكات خوێندن بە زمانی كوردی لە توركیا رێگەی پێ بدرێت، بۆ ئەمەشیان پێویستە سیستەمی پەروەردە لە توركیا گۆڕانی بەسەردا بێت.

هەروەها میدیاكانی توركیا ئاشكرای دەكەن، جەهەپە دووپارتی دەكاتەوە پێویستە هەموو نەتەوەیەك لە توركیا بە یەكسانی مامەڵەی لەگەڵدا بكرێت لە هەموو روویەكەوە.

جەهەپە لە ٢٠١٥ لەو بڕوایەدا بوو كە كێشەی كورد كێشەی نەبوونی دیموكراتییە لە توركیا، بۆیە گرنگە ئەو كێشەیە چارەسەر بكرێت تا هیچ كاتێك كورد بیر لە بەكارهێنانی چەك نەكاتەوە لە توركیا و لە بنەڕەتەوە كێشەكە بەرەو چارەسەربوون بڕوات.

ماڵپەری (T24)ی توركی بڵاوی كردووەتەوە، جەهەپە دووپارتی دەكاتەوە كە پێویستە لەناو پەرلەمانی توركیا كێشەی كورد چارەسەر بكرێت، ئەویش بە دەركردنی یاسایەكی تایبەت نابێت، بەڵكوو پێویستە دەستووری بۆ بگۆردرێت، بۆ ئەمەشیان تەنیا پارتێك نابێت پشتگیریی ئەو پڕۆسەیە بكات، بەڵكوو پێویستە كۆدەنگیی كۆمەڵگە و هەموو پارتە سیاسییەكانی لەسەر بێت.













باسنيوز