وەزارەتی تەندروستیی حکومەتی هەرێمی کوردستان رایدەگەیێنێت، بە فەرمانی سەرۆکوەزیرانی هەرێمی کوردستان، ملیارێک دینار بۆ تەندروستیی دهۆک تەرخاندەکرێت.

وەزارەتی تەندروستی دەڵێت، تەرخانکردنی ئەو بڕە پارەیە لە چوارچێوەی هەوڵەکانی حکومەتی هەرێمی کوردستانە بۆ رووبەڕووبوونەوەی کۆرۆنا و پارەکەش "بەشێکە لە بودجەی فریاکەوتنی حکومەتی هەرێمی کوردستان بۆ بەرەنگاربوونەوەی کۆرۆنا کە بۆ دەڤەر و پارێزگاکان تەرخانکراوە".

ئەم هەوڵەی حکومەتی هەرێمی کوردستان دوای ئەوە دێت کە لە چەند رۆژی رابردوودا، ژمارەی تووشبووانی کۆرۆنا لە دهۆک بەرزبوونەتەوە و تەنیا رۆژی سێشەممە 4ی ئاب 83 تووشبووی نوێی کۆرۆنا لە پارێزگاکە دەستنیشانکراون.

تاوەکو ئێستا لە دهۆک 801 تووشبووی کۆرۆنا دەستنیشانکراون، لەو ژمارەیەش 376 تووشبوو چارەسەرکراون و شەش تووشبووش گیانیان لەدەستداوە.

دەقی راگەیێندراوی وەزارەتی تەندروستیی هەرێمی کوردستان:

بە فەرمانی سەرۆکی حکومەتی هەرێمی کوردستان بڕی یەک ملیار دینار بۆ تەندروستی پارێزگای دھۆک تەرخانکرا.

بە فەرمانی ڕێزدار مەسرور بارزانی سەرۆکی حکومەتی هەرێمی کوردستان و لە چوارچێوەی هەوڵەکانی حکومەتی هەرێمی کوردستان بۆ ڕووبەڕووبوونەوەی پەتای کۆرۆنا ،بڕی یەک ملیار دینار بۆ تەندروستی و پارێزگای دھۆک تەرخانکرا کە بە شێکە لە بودجەی فریاکەوتنی حکومەتی هەرێم بۆ بەرەنگاربوونەوەی کۆرۆنا کە بۆ دەڤەر و پارێزگاکانی هەرێم تەرخانکراوە.

وەزارەتی تەندروستی
حکومەتی هەرێمی کوردستان
5ی ئابی 2020






rudaw