بەڕێوەبەرایەتی پۆلیسی ڕاپەڕین ئاشکرای کرد، ئەمڕۆ ئەو کەسە دەستگیرکرا کە ھەفتەی ڕابردوو بەمەبەستی ئەنجامدانی گەشتی عومرە پارەی لە ھاووڵاتییان وەرگرتووەو ڕایکردوە.

شۆڕش ئیسماعیل،گوتەبێژی پۆلیسی ڕاپەڕین ڕايگەیاند: "دوای ئەوەی لە ھەفتەی ڕابردوو لە شاری ڕانیە ژمارەیەک هاووڵاتی سکاڵایان لەسەر کەسێک تۆمارکرد کە بەمەبەستی ئەنجامدانی گەشتی عومرە پارەی لێوەرگرتوون و بۆ شوێنێکی نادیار ڕایکردووە، ڕێکاری یاسایی و پێویستمان بەرانبەر ئەو کەسە گرتەبەر".

گوتیشی: "دوای بەدواداچوون و بەدەستھێنانی زانیاری، بۆمان دەرکەوت ئەو کەسە لە شاری سلێمانییە بۆیە فەرمانی دەستگیرکردنیمان نارد بۆ بەڕێوەبەرایەتی ئاسایشی پارێزگای سلێمانی و تۆمەتبارەکەیان دەستگیرکرد و ڕادەستی بەڕێوەبەرایەتیمانیان کردەوە".

ئەوەشی ڕوونکردنەوە کە دوای لێکۆڵینەوە لەگەڵ تۆمەتبارەکە ،دانی ناوە بەوەی کە بڕی شەش ھەزار و حەوسەد دۆلاری ئەمریکی لە ٦٧ کەس بە فێڵی ئەنجامدانی عومرە وەرگرتووە دواتر ڕایکردوە بۆ دەرەوەی ھەرێمی کوردستان و دوای چەند ڕۆژێک گەڕاوەتەوە بۆ ھەرێمی کورستان و دەستگیرکراوە و ئێستا بەندکراوە.












باسنيوز