نووسەرێكی دیاری توركیا، كە رۆمانەكانی فرۆشێكی زۆریان هەیە، پێی وایە پێویستە جەهەپە و پارتی باش و هەدەپە بە یەكەوە هاوپەیمانییەتێك دروست بكەن بۆ چارەسەركردنی كێشەی كورد، هەروەها دەڵێت ئەگەر لە توركیا كێشەی كورد چارەسەر بكرێت، دیموكراتیش چارەسەر دەبێت.

ئەحمەد ئومیت كە یەكەم رۆمانی بەناوی (شەو بەپێی پەتی) لە ١٩٩٢ بڵاوكردەوە و خوێنەرێكی زۆری هەبوو و پاشان لە ١٩٩٦ دووەم رۆمانی خۆی بەناوی (شەو و تەم) بڵاو كردەوە، ئاماژە دەدات كە گرنگ و پێویستە لە توركیا كێشەی كورد چارەسەر بكرێت.

ئەو لە دیمانەیەكیدا لەگەڵ رۆژنامەی (ئیندیپێندێت) بەشی توركی، ئاماژە دەدات دونیا بە قۆناغێكی زۆر خراپدا تێپەڕ دەبێت، چونكە ئەوانەی بێكارن و ئەوانەی هەژارن، لە هەڵبژاردنەكاندا كەسانی وەكوو دۆناڵد ترەمپ و پۆتین وەكو سەرۆك هەڵدەبژێرن. هەروەها كەسە تۆتالیتارەكانیش لە زۆرێك لە وڵاتان لە دەسەڵاتن و لە ئەورووپاش ئیسلام فۆبیا لە برەودایە، بۆیە قۆناغەكە زۆر خراپە.

ئەو لەبارەی چارەسەركردنی كێشەی كورد لە توركیا دەڵێت: "ئەگەر بێت و لە توركیا كێشەی كورد چارەسەر بكرێت، دڵنیا بن دیموكراتیش چارەسەری بۆ دەدۆزرێتەوە، ئەمەش بەوە دەبێت كە جەهەپە و پارتی باش، هەدەپەش بخەنە ناو ئەو هاوپەیمانییەی بە ناوی (میللەت) دروستیان كردووە".

باس لەوەش دەكات، كە لە دونیادا راستڕەوەكان بەردەوام دەنگەكانیان لە برەودایە، ئەمەش رەنگە دونیا بەرەو شەڕێكی گەورە ببات. لە كۆبوونەوەی لووتكەی ناتۆش بینیمان كە هەڵسوكەوتی سەرۆكەكان زۆر خراپ و شپڕزە بوو.

ئەو دەڵێت: "لە١٠٠ ساڵی رابردوودا ئیپمراتۆرەكان كەوتن و لەناو چوون، لە توركیاش ئیمپراتۆری عوسمانیی ڕووخا، لە شوێنی ئەویش حكوومەتێكی كۆماری دروست بوو، بەڵام كۆمەڵگەی توركیا ئامادەی ئەو كۆمارییە نەبوو، چونكە بورژوازیی توركیا وەكوو بۆرژوازی ئەڵمانیا و فەڕەنسا نەبوو و لەڕووی ئیكۆنۆمی و سۆسیۆلۆژییەوە ئامادەی ئەو حكوومەتە كۆمارییە نەبوو. تۆ سەیری كە ئێمە بەرلە وڵاتانی ئەورووپا مافمان بە ئافرەت دا، بەڵام لە توركیا زۆرترین رێژەی كوشتنی ئافرەت تۆمار كراوە".

لە كۆتاییدا باسی لەوە كرد، كە كردنەوەی گرێكوێرەی دیموكراتی و ئازادی لە توركیا، چارەسەركردنی كێشەی كوردە، بۆیە گرنگترین كێشەی توركیا لە ئێستای توركیادا بوونی كێشەی كوردە.













باسنيوز