درێژەی شەڕی نێوان هۆزەكان لە پارێزگای دیالە، بووەتە هۆی شەپۆلی كۆچی بەلێشاوی خێزانەكان لەو ناوچەیە.

عەقید نیهاد محەمەد، گوتەبێژی پۆلیسی دیالە، رايگەیاند: "شەڕی هۆزەكان لە چەند ناوچەیەكی سنووری دیالە، هێندە مەترسی دروست کردووە تەنیا لەم هەفتەیەدا زیاتر لە 100 ماڵباتی دوور لەو هۆزانەی كە بەشێك نین لە ناكۆكییەكان ماڵ و حاڵی خۆیان بەجێ هێشتووە."

گوتیشی: "لە شەڕ و ناكۆكیی نێوان هۆزەكاندا چەكی قورسی بەكار دەهێنرێت، بۆیە پۆلیسی و سوپا بوونەتە ناوبژیوان."

بە گوتەی زاهیر حەسەن، كە ئاوارەیەكی دەستی شەڕی هۆزەكانە، زۆرینەیان تەنیا بە جلوبەرگ و چەند بەتانی و کەلوپەلی سەرەتاییەوە ماڵ و حاڵی خۆیان بەجێ هێشتووە.

ماوەی چەند رۆژێكە لە چەند ناوچەیەكی پارێزگای دیالە و ناوچەی "شێخ باوە" شەڕی نێوان هۆز و خێزانە عەرەبەکان بووەتە مەترسی بۆ سەر هاووڵاتیانی سڤیل كە بە هیچ شێوەیەک بەشێك نین لە ناكۆكییەكان و ئەمەش مەترسی و دڵەڕاوکێی کۆمەڵایەتی و دیاردەی کۆچ و ماڵوێرانیی دروست کردووە.












باسنيوز