سەرۆك مەسعود بارزانی پێشوازی لە ستیفن هیكی، باڵوێزی تازەی به‌ریتانیا لە عێراق و شاندێكی یاوەری كرد.

لە دیدارەكەدا كه‌ ئه‌مڕۆ سێشەممە 17/12/2019 لە سەلاحەددین به‌ڕێوه‌ چوو، سەرۆك بارزانی پیرۆزبایی دەستبەكاربوونی باڵوێزی تازەی به‌ریتانیا لە عێراق كرد و هیوای سەركەوتنی بۆ خواست.

هەر لەو دیدارەدا بارودۆخی سیاسیی عێراق و كێشە و تەحەددیاتی بەردەم پڕۆسەی سیاسیی عێراق و داوكاریی خۆپێشاندەران، هەروەها نیگەرانییەكان لەبارەی سەرهەڵدانی بۆشایی ئیداری و سیاسی تاوتوێ كرا.

لە بەشێكی دیكه‌ى ئەو كۆبوونەوەیەدا، ڕۆشنایی خرایە سەر پەیوەندییەكانی نێوان هەرێمی كوردستان و به‌ریتانیا و باڵوێزی به‌ریتانیا لە عێراق جەختی لەوە كردەوە كە وڵاتەكەی خوازیاری ئەوەیە كە هەرێمی كوردستان بەهێز و یەكگرتوو بێت.

ئاڵوگۆڕكردنی بیروڕا لەبارەی بارودۆخی سووریا و مەترسییەكانی سەرهەڵدانەوەی داعش تەوەرێكى دیكه‌ى ئەو دانیشتنە بوون.












باسنيوز