وەزیری پێشمەرگەی حکوومەتی هەرێمی کوردستان پەیامێک بۆ کەسوکاری ئەو سێ پێشمەرگەیەی رۆژی رابردوو لە رووبەڕووبوونەوەی رێکخراوی تیرۆریستی داعش شەهیدبوون، دەنێرێت.

لە پەیامەکەیدا، کە وێنەیەکی گەیشتووەتە، شۆڕش ئیسماعیل، وەزیری پێشمەرگە سەرەخۆشیی لە کەسوکاری شەهیدەکان کردووە و هیوای شیفا بۆ بریندارەکان دەخوازێت.

شۆڕش ئیسماعیلل هەروەها رایگەیاندووە، تیرۆریستانی داعش هەوڵیان دا خەونی زڕاویان بهێننە دی، بەڵام ”هه‌ر زوو هێزی نه‌به‌ردی پێشمه‌رگه‌کانی (لیوای سێی پیادە) لێیان هاتنه‌ ده‌ست و به‌توندی به‌رپه‌رچیان دانه‌وه‌“.

شەوی چوارشەممە 4-12-2019، چەکدارانی داعش هێرشیان کردە سەر هێزێکی پێشمەرگە لە گوندی دەکەی عەبدولقادر بەگ لە سنووری خانەقین و بە هۆیەوە شەهیدبوونی سێ پێشمەرگە.

دەقی پرسەنامەکەی وەزیری پێشمەرگە:

به‌ناوی خودای گه‌وره‌و میهره‌بان

كه‌س وكاری شه‌هیده‌ سه‌ربه‌رزه‌كان

بنه‌ماڵه‌ی شه‌هیدان (لوقمان تاهیر نەجم، مەحمود محمد مەعروف، زیاد خه‌لیفه‌ سوڵتان )

به‌داخه‌وه‌، جارێكی تر تیرۆریستان و تاریكپه‌رستان هێرشیان كرده‌ سه‌ر رۆژئاوای خانه‌قین و سنووری گه‌رمیان، له‌و هێرشه‌ نه‌گریسه‌یاندا هه‌وڵیان دا خه‌ونی زڕاویان بێننه‌دی، به‌ڵام هه‌ر زوو هێزی نه‌به‌ردی پێشمه‌رگه‌کانی (لیوای سێی پیادە) لێیان هاتنه‌ ده‌ست و به‌توندی به‌رپه‌رچیان دانه‌وه‌.

وێڕای ئه‌وه‌ی هێزه‌كانی پێشمه‌رگه‌، توانیان تیرۆریستان راوبنێن و ناوچه‌كانیان بپارێزن، به‌ڵام به‌داخه‌وه‌ ژماره‌یه‌ك پێشمه‌رگه‌ی قاره‌مان شه‌هید و برینداربوون.

له‌م بۆنه‌ خه‌مناكه‌دا، سه‌ره‌خۆشی و هاوخه‌می خۆمان به‌ته‌واوی بنه‌ماڵه‌ و كه‌س و كاری شه‌هیدانی ئه‌و په‌لاماره‌ تیرۆریستیه‌ ده‌گه‌ینین، كه‌ سه‌ریان به‌رزه‌ به‌وه‌ی رۆڵه‌كانیان له‌پێناو پاراستنی خاكی كوردستان گیانیان به‌خشی.

هه‌موو لایه‌ك دڵنیاده‌كه‌ینه‌وه‌، كه‌ هێزی پێشمه‌رگه‌ی كوردستان به‌رده‌وام سازو ئاماده‌یه‌ بۆ هه‌ر رووبه‌ڕوبونه‌وه‌یه‌ك و خه‌ونی گڵاوی تیرۆریستان له‌گۆڕ ده‌نێین و دووپاتی ده‌كه‌ینه‌وه‌ گیانی خه‌ڵك و خاكی هه‌رێمی كوردستان پارێزراوه‌.

له‌یه‌زدانی مه‌زن داواكارم زوو به‌زوو شیفای برینداره‌كان بدات و له‌جه‌نگی رووبه‌ڕبوونه‌وه‌ی تیرۆر سه‌ركه‌وتوو و سه‌ربه‌رزمان بكات.

شۆڕش ئیسماعیل

وه‌زیری پێشمه‌رگه‌ی حكومه‌تی هه‌رێمی كوردستان









باسنیوز