پێشنیوەڕۆی ئەمڕۆ یەکشەممە لەبەردەم بارەگای نەتەوە یەکگرتووەکان لە هەولێر ڕێکخراوەکانی ژنان و لاوانی ڕۆژهەڵاتی کوردستان و جەماوەرێکی زۆری هاووڵاتیی ڕۆژهەڵاتی کوردستان و چەند ڕێکخراوێکی باشوور گردبوونەوەیەکی ناڕەزایی ڕێک خرا.

بەپێی زانیارییەکان گردبوونەوەکە کە بە ئامانجی پشتگیریی لە خۆپیشاندەرانی ڕۆژهەڵات و ئیدانەکردنی کوشتنی هاووڵاتیانی ڕۆژهەڵات لەلایەن ئێرانەوە ساز درابوو، لەلایەن ناوەندی ژنانی ڕۆژهەڵاتیی کوردستان و کۆمیتەی هاوئاهەنگیی لاوانی ڕۆژهەڵات ڕێک خرابوو، کە کۆمەڵێکی بەرچاو لە هاووڵاتییانی ڕۆژهەڵاتی نیشتەجێی باشوور و چالاکوانانی سیاسی و مەدەنیی ڕۆژهەڵات و باشوور تێیدا باشدارییان کرد.

لەو گردبوونەوەیەدا ڕێکخراوەکانی ژنان و لاوانی پارت و لایەنە سیاسییەکانی ڕۆژهەڵاتی کوردستان بە خوێندنەوەی دوو بەیانناممە وێڕای ئیدانەکردنی کوشتن و سەرکوتی خۆپیشاندەرانی ڕۆژهەڵاتی کوردستان، داوای پاڵپشتی و پشتیوانیی سیاسییان لە نەتەوە یەکگرتووەکان و کۆمەڵگەی نێودەوڵەتی کرد و هاوکات بو توندی کوشتن و دەستگیرکردنی خۆپیشاندەرانی ڕۆژهەڵاتی کوردستانیان لەلایەن ئێرانەوە ئیدانە کرد.

خۆپیشاندان و ناڕەزایی جەماوەری لە ئێران و ڕۆژهەڵاتی کوردستان کە لە شەممەی هەفتەی ڕابردووەوە بەهۆی گرانبوونی بەهای بەنزین دەستی پێکرد، لە سەرتاسەری ئێران نزیکەی 200 کەس کوژران کە 48 کەسیان لە ڕۆژهەڵاتی کوردستان بوون و بەپێی دوایین زانیارییەکان لە سەرجەم شارەکانی ڕۆژهەڵاتی کوردستان زیاتر لە یەک هەزار کەس دەستگیر کراوە و ژمارەی بریندارەکانیش زیاتر لە یەک هەزار کەس.










باسنیوز