لە سەردانێکی فەرمیدا بۆ شاری لۆگزامبۆرگ، د. دلاوەر خالید ئاژگەیی، نوێنەری حکوومەتی هەرێمی کوردستان لە یەکێتی ئەوروپا بە یاوەریی شاندێکی نوێنەرایەتی، سەردانی وەزارەتی دەرەوەی لۆگزامبۆرگی کرد و لەلایەن ئۆلیڤەر مائێس، بەرێوەبەری گشتیی پەیوەندییە سیاسییەکانی وەزارەتی دەرەوەی لۆگزامبۆرگ و بەرپرسی بەشی ڕۆژهەڵاتی ناوەراست و باکووی ئەفریقیا پێشوازی لێکرا.

لە کۆبوونەوەیەکدا، دلاوەر ئاژگەیی لەگەڵ ئۆلیڤەر مائێس بە تێروتەسەلی بارودۆخی هەرێمی کوردستان و عێراق و ناوچەکەی شیکردەوە و دیدی حکومەتی هەرێمی کوردستانی لە سەر کۆی ڕووداوەکان خستەڕوو.

هاوکات باسی لە سیاسەتی نوێی حکومەتی هەرێم کرد بۆ باشترکردنی پەیوەندیەکان لەگەڵ بەغدا و پڕۆژەی چاکسازی و ڕیفۆرم و سیاسەتی پەرەپێدان بە ئابووری بەهێز و گرنگیدان بە کەرتی کشتوکاڵ و گەشتوگوزاری. داواشی کرد لەم ڕووانەوە پەیوەندیی دوولایەنە لە نێوان هەرێمی کوردستان و لۆگزامبۆرگ پەرەی پێبدرێت لە ڕێگەی وەزارەتی بازرگانی لۆگزامبۆگ و ژووری بازرگانیی هەردوولا، هەروەها دەرفەت بۆ کۆمپانیاکان بڕەخسێندرێت تا وەبەرهێنان لە هەرێمی کوردستان بکەن.

وەزارەتی دەرەوەی لۆگزامبۆرگ ئامادەیی وڵاتەکەی بۆ دروست کردنی پەیوەندیی سیاسی، بازرگانی و ئابووری لەگەڵ هەرێمی کوردستان نیشان دا و بڕیاریان دا کۆبوونەوەی تایبەت لە نێوان هەردوولادا ئەنجام بدرێت.

لە بەشێکی تری کۆبوونەوەکە، دلاوەر ئاژگەیی باسی لە سیاسەتی دەرگا و دڵی کراوەی هەرێمی کوردستانی کرد بۆ ئاوارە و پەنابەران و سەرجەم پێکهاتە جیاوازەکان لە ناوچەکە بە گشتی، هەروەها باسی لە لێشاوی هاتنی زیاتر لە ١٦٠٠٠ پەنابەری نوێی سوری کرد بۆ ناو خاکی هەرێم، سەڕەڕای هەبوونی زیاتر لە ١ ملیۆن ئاوارەی ناوخۆیی عێراقی و پەنابەری سووری. هاوکات داوای هاوکاری و پشتگیری حکوومەتی لۆگزامبۆرگی بۆ هەرێمی کوردستان کرد تا لە ڕێگەی ڕێکخراوە ناحکوومییەکانەوە بە شێوەیەکی ڕاستەوخۆ هاوکاری پێشکەش بە پەنابەران بکات.

لە بەشێکی دیکەی گفتوگۆکەی نێوانیاندا، ئاژگەیی و مائێس تاوتوێی دروست کردنی پەیوەندیی نێوان پەرلەمانی کوردستان و پەرلەمانی لۆگزامبۆرگیان کردووە. لەم بارەیەوەش هەردوولا هاوڕابوون لەسەر ئەوەی کەوا پتەوکردنی پەیوەندیی نێوان هەردوو پەرلەمان، پەیوەندیی هەردوو حکوومەتیش بەهێز دەکات.

لۆگزامبۆرگ، ئەندامی یەکێتیی ئەورووپا و ناتۆیە، پێشتر ئۆلیڤەر مائێس بە نوێنەرایەتیی لۆگزامبۆرگ سەرۆکایەتیی ئەنجومەنی ئاسایشی نەتەوە یەکگرتووەکانی لە ئەستۆ گرتووە و وەکوو دیپلۆماتێکی سەرکەوتوو لە ناوەندە سیاسییەکان ناسراوە. وەزیری دەرەوەی ئەم وڵاتە دوو جار سەردانی هەرێمی کوردستانی کردووە.













باسنيوز