سەرۆکی شارەوانیی هەولێر نامەی دەست لەکار کێشانەوە ڕادەستی وەزیری شارەوانی و گەشتوگوزاری هەرێمی کوردستان دەکات، وەزیری شارەوانیش ڕای دەگەیەنێت کە بابەتەکە ”لە چوارچێوەی گۆڕانکارییەکانی حکوومەتی هەرێمی کوردستان دایە“.

بە پێی ئەو زانیارییانەی که لە سەرۆکایەتیی شارەوانیی هەولێرەوە دەست کەوتووە، ئەمڕۆ چوارشەممە ٢٠ی ١١ی ٢٠١٩، ئەندازیار سامان محەمەد، سەرۆکی شارەوانیی هەولێر، نامەی دەست لەکار کێشانەوەی پێشکەش بە ساسان عەونی، وەزیری شارەوانی و گەشتوگوزاری حکوومەتی هەرێمی کوردستان کردووە.

لەلایەن خۆیەوە ساسان عەونی، وەزیری شارەوانی و گەشتوگوزاری حکوومەتی هەرێمی کوردستان ڕايگەیاند: ”سەرۆکی شارەوانیی هەولێر نامەی دەست لەکار کێشانەوەی پێشکەش کردووم“.

ڕوونیشی کردەوە کە بابەتی دەست لەکار کێشانەوەکە ”لە چوارچێوەی گۆڕانکارییەکانی حکوومەتە و ئەو پۆستە گۆڕانکاری تێدا دەکرێت و دەدرێتە کەسێکی دیکە".

ساسان عەونی رەتی کردەوە بابەتی دەست لەکار کێشانەوەکەی سامان محەمەد پەیوەندی بە لێپرسینەوەوە هەبێت، بەڵکوو ”لەچوارچێوەی کۆمەڵێک گۆڕانکارییە لە پۆستە ئیداری و حکوومییەکان کە ئەو گۆڕانکارییانە بەردەوامیشیان دەبێت“.













باسنيوز