بەرپرسی ڕاگەیاندنی نەخۆشخانەی گشتیی شەهید ڕەئووف بەگ لە شارەزوور ڕای دەگەیەنێت ڕێكخراوی GIZی ئەڵمانی لە چوارچێوەی كار و چالاكییەكانی خۆیدا لەپێناو ژینگەی قەزاكە، ماوەی چەند ڕۆژێكە دەستی كردووە بە پاككردنەوە و بڕینی دار و درەخت و باخچەی نەخۆشخانەكەمان و لەو ڕێگەیەشەوە هەلیكاریان بۆ ژمارەیەك هاووڵاتی ڕەخساندووە.

كەمال ئەحمەد، بەرپرسی ڕاگەیاندنی نەخۆشخانەی گشتیی شەهید ڕەئووف بەگ لە شارەزوور، ڕایگەیاند: "ڕێكخراوی GIZی ئەڵمانی لەڕێگەی قایمقامیەتی قەزای شارەزوو و بە هاوكاریی سەرۆكایەتیی شارەوانیی قەزاكە، ماوەی چەند ڕۆژێكە دەستی كردووە بە پاككردنەوە و بڕینی دار و درەخت و باخچەی نەخۆشخانەكەمان و بڕیارە تا چەند ڕۆژی داهاتووش لە كارەكانیان بەردەوام بن".

گوتیشی: "ڕێكخراوەكە بەمەبەستی ڕەخساندنی هەلیكار بۆ هاووڵاتیان نزیكەی 40 ڕۆژە هاتووەتە سنووری قەزای شارەزوو و چالاكییەكانیشی كە زیاتر خۆی لە بواری ژینگەدا دەبینێتەوە هەلیكاری بۆ ژمارەیەك هاووڵاتی ڕەخساندووە".

ئاماژەی بەوەش دا: "لەو ماوەیەدا ڕێكخراوەكە باخچەی بەشێكی زۆر لە فەرمانگەكانی سنووری قەزای شارەزوور و ناوەندەكانی خوێندنیان پاك كردووەتەوە".











باسنیوز