سه‌رۆکی کۆمه‌ڵی قوربانییانی چه‌کی کیمیایی لە هه‌ڵه‌بجه‌ ئاشکرای کرد، بە بڕیاری سەرۆکی حکوومەتی هەرێمی کوردستان، دەیان بەرکەوتووی چەکی کیمیایی لە هەڵەبجە ڕەوانەی دەرەوەی وڵات دەکرێن.

لوقمان عه‌بدولقادر، سه‌رۆکی کۆمه‌ڵه‌ی قوربانییانی چه‌کی کیمیایی لە هه‌ڵه‌بجه‌ رايگەیاند: ”بە ڕەزامەندیی مەسرور بارزانی، سەرۆكی حكوومەتی هەرێمی كوردستان، ئەو نەخۆشانەی بەركەوتووی كیمیایین و پێویستیان بە چارەسەر هەیە، ڕەوانەی دەرەوە دەكرێن“.

ڕوونی کردەوە کە لە ئایندەیەکی زۆر نزیکدا بەرکەوتووانی چەکی کیمیایی ڕەوانەی دەرەوەی وڵات دەکرێن کە نوێنەری وەزارەتی تەندرووستیشیان لەنێو دایە و ”ڕەزامەندییش وەرگیراوە".

داوای ئەوەشی کرد کە ئەم هەنگاوە بەردەوام بێت و بڕیارەکەی سەرۆک وەزیرانی هەرێمی کوردستانی بە جێگەی دەستخۆشی ناوبرد.

هەر لەمبارەیەوە ‌محه‌مه‌د قادر، گوته‌بێژی وه‌زاره‌تی ته‌ندرووستیی حکوومەتی هەرێمی کوردستان رايگەیاند، ژماره‌ی ئه‌و به‌رکه‌وتووانه‌ی چه‌کی کیمیاوی که‌ ده‌نێردرێنه‌ ده‌ره‌وه‌، 47 که‌سن و به‌شێکیان پێویستیان به‌چه‌ند جارێک سه‌ردانی پزیشک هه‌یە.

ڕوونیشی کردەوە کە ئێستا وه‌زیری ته‌ندرووستیی حکوومەتی هەرێمی کوردستان ئاماده‌کاری بۆ ئه‌م مه‌به‌سته‌ کردووه‌ و پێشووتریش کۆبوونه‌وه‌ له‌گه‌ڵ پارێزگاری هه‌ڵه‌بجه‌ و لايه‌نه‌ په‌یوه‌ندیداره‌کان کراوه‌.













باسنيوز