سەرکردەیەکی پارتی کرێکارانی کوردستان (پەکەکە) لە رۆژئاوای کوردستان رایدەگەیەنێت، کە هەرگیز داوای دروستکردنی کیانێکی کوردی لە رۆژئاوا، ناکەن.

ئیلهام ئەحمەد، هاوسەرۆکی ئەنجومەنی سووریای دیموکراتی (مەسەدە)ی باڵی سیاسیی هێزەکانی سووریای دیموکراتی (هەسەدە) بە رۆژنامەی (شەرقولئەوسەت)ی راگەیاندووە، ئەمڕیکا لە بڕیاری کشانەوە لە رۆژئاوای کوردستان پەشیمان بووەتەوە و ”بە فەرمیش بە ئێمەی راگەیاندووە“.

ئیلهام ئەحمەد هەروەها رایگەیاندووە، لە سەردانێکیدا بۆ ئەمریکا، داوای کردووە ئەو وڵاتە کۆتایی بە هەڕەشەکانی تورکیا بۆ سەر رۆژئاوای کوردستان بهێنێت و سزای بدا و بەشداریی بە مەسەدە بکا لە گفتگوگۆ سیاسییەکان لەبارەی پرۆسەی سیاسی لە سووریا.

هاوسەرۆکی مەسەدە، کە بە سەردانێک لە لەندەنی پایتەختی بەریتانیایە، ئاماژەی بە داواکارییەکانیان لە وڵاتانی ئەوروپی کردووە، کە ئەمانەن؛

- کۆتاییهێنان بە هەڕەشەکانی تورکیا

- سزادانی تورکیا

- نەناردنی چەک بۆ تورکیا

- سەپاندنی سزای دارایی بەسەر تورکیا

- ناردنی هێزی نێودەوڵەتی بۆ سنوورەکانی نیوان رۆژئاوای کوردستان و تورکیا

- دامەزراندنی دادگایەکی تایبەت بە دادگاییکردنی چەکدارە دەستگیرکراوەکانی داعش

ئیلهام ئەحمەد رەتی کردووەتەوە خەباتی نەتەوەیی کوردی بکەن و رایگەیاندووە، ”هەرگیز و بە هیچ شێوەیەک داوای دامەزراندنی کیانێکی کوردیمان نەکردووە و نایکەین“.

ئەو سەرکردەیەی پەکەکە ئاماژەی بە هەوڵەکانیان بۆ چەسپاندنی ئیدارەی خۆجێیی رۆژئاوای کوردستان لە دەستووری سووریا وەک ”ئیدارەی خۆجێی نەک ئیدارەی کوردی“ کردووە و رایگەیاندووە، ”ئیدارەکەمان بەشێکە لە سووریا“.

هەسەدە هێزێکی سەربازییە و بە پشتیوانیی ئەمریکا بۆ رزگارکردنەوەی ناوچە داگیرکراوەکانی رۆژئاوای کوردستان و سووریا لە رێکخراوی تیرۆریستی داعش، پێکهاتووە. یەکینەکانی پاراستنی گەل (یەپەگە)ی باڵی سەربازیی پارتی کرێکارانی کوردستان (پەکەکە) لە رۆژئاوای کوردستان، باڵی سەرەکیی ئەو هێزەیە.








باسنيوز