بەرپرسێكی كۆمەڵی ئیسلامیی كوردستان لە کەرکووک ڕای دەگەیەنێت، لایەنە كوردستانییەكانی كەركووك داوای كۆتاییهێنان بە دەسەڵاتی سەربازی لە شاری کەرکووک دەکەن.

كەمال جەباری، بەرپرسی مەكتەبی پەیوەندییەكانی مەڵبەندی كەركووكی كۆمەڵی ئیسلامیی كوردستان ڕايگەیاند: "لایەنە كوردستانییەكانی كەركووك لەگەڵ كۆتایهێنان بە دەسەڵاتی سەربازین لە شاری كەركووك و لەم چەند رۆژەی رابردوودا لایەنەكانی كەركووك كۆبوونەوەیەكیشیان ئەنجام دا و سەرەكیترین خاڵ كە لە كۆبوونەوەكە باس كرا، باسی دۆخی كەركووك كرا و داوا كراوە ئیتر كۆتایی بە دەسەڵاتی سەربازی لە شارەكە بهێندرێت".

گوتیشی: "هاوكات دووپاتی یەكڕیزیی نێو ماڵی کورد و لایەنە سیاسییەكان كرایەوە، بەتایبەتی لە كەركووك، هەروەها داوا لە مەكتەبی سیاسیی حزبەكان كرا كە خەمێك لە دۆخی ئێستای شاری كەركووك بخۆن، چونكە شارەكە حوكمی عەسكەری بەڕێوەی دەبات و حوكمی مەدەنی بەهۆی رووداوەكانی رابردوەوە فەرامۆش كراوە".

لە 16ی ئۆكتۆبەری 2017 میلیشیاكانی حەشدی شەعبی كەركووكیان بە ڕێككەوتن لەگەڵ گرووپێكی خیانتەكار داگیر كرد و لەو كاتەوە حوكمی سەربازی سەپێندراوە بەسەر شارەكەدا.













باسنيوز