رۆژی چوارشەممە په‌رله‌مانی‌ كوردستان کۆدەبێتەوە و خوێندنەوەی یەکەم بۆ پێشنیازی دامەزراندنی فەرمانبەرانی گرێبەست لە هەرێمی کوردستان و چەند تەوەرێکی دیکە دەکات.

به‌پێی‌ بەرنامەی کاری پەرلەمانی کوردستان، لە کۆبوونەوەکەدا خوێندنەوەی یەکەم بۆ "پێشنیازی دامه‌زراندنی‌ فه‌رمانبه‌رانی‌ گرێبه‌ست، پێشنیازی یاسای پاراستنی بەرهەمە خۆماڵییەکان، یاسای بەرەنگاربونەوەی بەقاچاخبردنی نەوت و بیمەی کشتوکاڵی" و چەند پرسێکی دیکە دەکرێت.

ده‌سته‌ى سه‌رۆكایه‌تیى په‌رله‌مان بڕیاریدا به‌رنامه‌ی كاری دانیشتنی ژماره‌ 7ى ئاسایی ساڵی یه‌كه‌م له‌ خولی پێنجه‌می هه‌ڵبژاردنی په‌رله‌مان له‌ كاژێر 11ى پێشنیوه‌ڕۆی رۆژی چوارشه‌ممه‌ 13-11-2019 به‌مشێوه‌یه‌ بێت:

یه‌كه‌م: خوێندنه‌وه‌ى یه‌كه‌م بۆ ئه‌م پێشنیازه‌یاسا و بڕیارانه‌ى خواره‌وه‌ به‌پێی مادده‌كانى (79 و 80 و 82)ى په‌یڕه‌وی ناوخۆی په‌رله‌مانى كوردستان.

1- پێشنیازی یاسای (پاراستنی به‌رهه‌مه‌ خۆماڵییه‌كان له‌ هه‌رێمی كوردستان - عێراق).
2 - پێشنیازی یاسای (به‌ره‌نگاربوونه‌وه‌ى به‌ قاچاخبردنی نه‌وت و لێده‌رهێنراوه‌كان له‌ هه‌رێمی كوردستان - عێراق).
3 - پێشنیازه‌یاسای (بیمه‌ی كشتوكاڵی له‌ هه‌رێمی كوردستان - عێراق).
4 - پێشنیازه‌بڕیارى (دامه‌زراندنی فه‌رمانبه‌رانی گرێبه‌ست له‌ هه‌رێمی كوردستان).

دووه‌م: دانان و ئاڵوگۆڕكردنی ژماره‌یه‌ك په‌رله‌مانتار له‌ لیژنه‌ هه‌میشه‌ییه‌كانی په‌رله‌مان و پێكهێنانی چوار لیژنه‌ی هه‌میشه‌یی په‌رله‌مان به‌پێی مادده‌كانی (28، 29، 34) له‌ په‌یڕه‌وی ناوخۆی په‌رله‌مانى كوردستان.

سێیه‌م: خستنه‌ڕووى بیرۆكه‌ی ئه‌م په‌رله‌مانتارانه‌ی خواره‌وه‌ به‌پێی خاڵی 2ـى بڕگه‌ی یه‌كه‌م له‌ مادده‌ى 49ى په‌یڕه‌وی ناوخۆی په‌رله‌مانی كوردستان - عێراق:

1 - بیرۆكه‌ی (جوان یونس رۆژبه‌یانی) په‌یوه‌ست به‌ دووباره‌ ته‌عریبكردن و مه‌ترسیی هه‌مواركردنه‌وه‌ى مادده‌ى 140ى ده‌ستوورى هه‌میشه‌یی عێراق.

2 - بیرۆكه‌ی (كاروان عەبدولرەحمان عەبدوڵڵا) په‌یوه‌ست به‌ پرسی چۆنییەتی شه‌فافكردنی نه‌وت له‌ هه‌رێمی كوردستاندا.