ئه‌ندامێكی سه‌ركردایه‌تی كه‌ركووك-گه‌رمیانی پارتی دیموكراتی كوردستان رایدەگەیەنێت، بە هەڵوەشاندنەوەی حکوومەتی عێراق بارودۆخی کەرکووکیش زیاتر تێک دەچێت.

د.فه‌رهاد كه‌ركووكی، ئه‌ندامێكی سه‌ركردایه‌تی كه‌ركووك-گه‌رمیانی پارتی رايگەیاند، بە هەڵوەشاندنەوەی حکوومەتی عادل عەبدولمەهدی، دۆخی عیراق بە تەواوی تێک دەچێت.

فەرهاد کەرکووکی هەروەها رایگەیاند، بە تێکچوونی بارودۆخی عێراق و هەڵوەشاندنەوەی حکوومەت، پرۆسەی ئاساییکردنەوەی بارودۆخی کەرکووک رادەگیرێت، چونکە لایەنە شۆڤینییەکانی کەرکووک و عێراق بەردەوام هەوڵی درێژکردنەوەی بارودۆخی نائاسایی کەرکووک دەدەن.

لەبارەی گەڕانەوەی حزبەکەی بۆ کەرکووک، ئەو بەرپرسەی پارتی رایگەیاند، بڕیاربوو لە رۆژی 1-10-2019 بارەگا داگیرکراوەکان رادەستی پارتی بکرێنەوە، بەڵام بەهۆی بارودۆخی خراپی عێراق وادەکە 20 رۆژ دواخرا و ئێستاش دیار نییە کەی ئەو بارەگایانە رادەستی حزبەکەی دەکرێنەوە.

دوای خیانەتی 16ـی ئۆکتۆبەری 2017، میلیشیاکانی حەشدی شەعبی کەرکووکیان داگیر کرد و پارتیش ئەو شارەی بە شارێکی داگیرکراو هەژمار کرد و بارەگاکانی کشاندەوە.













باسنيوز