600 پەنابەرێن دی ژ رۆژئاڤایێ كوردستانێ گەهشتنە باشوورێ كوردستانێ
سالم سەعید، بەرپرسێ راگەهاندنێ ل بۆردێ كارۆبارێن مرۆڤایەتی ل پارێزگەها دهۆكێ دیار كر: "هەتا نۆكە ژمارا پەنابەرێن رۆژئاڤایێ كوردستانێ گەهشتنە 1600 كەسان یێن ژ رۆژئاڤا بەرەڤ باشوورێ كوردستانێ هاتین. ل شەڤا بۆرێدا ژی هەموو تیمێن مە دئەركێ دا بوون بۆ خزمەتكرنا خەلكێ مە یێ رۆژئاڤایێ كوردستانێ. ل رۆژێن دەستپێكێ 180 كەس هاتن و دۆهی ژی 820 كەس ژ رۆژئاڤایێ كوردستانێ بەرەڤ باشوورێ كوردستانێ هاتن. ب پشتەڤانیا دەزگەهێ خێرخوازی یێ بارزانی و رێكخراوان مە ل كەمپا بەردەرش ئاكنجی كرن. ئەڤرۆكە ژی 600 پەنابەر لسەر سنۆری نە. ئەم یێ ئامادەكاریان دكەن بۆ ڤەگوهاستنا وان بۆ كەمپا بەردەرش، پشتی كارۆبارێن وان ب دووماهیی دهێن".
خویا ژی كر: "دەمێ شەرێ لسەر رۆژئاڤایێ كوردستانێ دەستپێكر بۆردێ كارۆبارێن مرۆڤایەتی دگەل هەموو دام و دەزگەهێن پەیوەندیدار و رێكخراوان ژی بەرهەڤیێن خوە كرن بۆ هاتنا پەنابەرێن رۆژئاڤایێ كوردستانێ. ئەم داخوازێ ژ جڤاكا نێڤدەولەتی و هەموو دەولەتان و رێكخراوان دكەین هەڤكاریا دهۆكێ بكەن بۆ خزمەتكرنا ئاوارە و پەنابەران".
باسنيوز
