مەسرور بارزانی، سەرۆکی حکومەتی هەرێمی کوردستان پێشوازیی لە شاندێکی باڵای سەربازیی بەریتانی کرد بە سەرۆکایەتی سێر جۆن لۆریمەر ڕاوێژکاری باڵای سەربازیی بەریتانیا لە ڕۆژهەڵاتی ناوەڕاست و باکووری ئەفریقیا.

لە دیدارەکەدا کە جەیمس سۆرنتن کونسوڵی گشتیی بەریتانیا لە هەولێر ئامادە بوو، بارودۆخ و پەرەسەندنەکانی گۆڕەپانی عێراق و سوریا تاوتوێ کران. جەخت لەوە کرایەوە کە شەڕ و تووندوتیژی لە بەرژەوەندی هیچ لایەکدا نییە و پێویستە بە گفتوگۆ کێشەکان چارەسەر بکرێن، هەروەها ئاماژە بەوە درا کە ئاڵۆزترکردنی زیاتری دۆخی ناوچەکە لێکەوتەی نەرێنی و نەخوازراوی ئەمنی و مرۆیی لێ دەکەوێتەوە.

لە کۆبوونەوەکەدا هەروەها گفتوگۆ دەربارەی گۆڕانکارییەکانی عێراقیش کرا و جەخت لە چارەسەرکردنی بنەڕەتییانەی کێشەکانی هەرێمی کوردستان و حکومەتی فیدراڵی کرایەوە، چونکە لە بەرژەوەندیی هەموو خەڵکی عێراقدایە.

شاندی میوان ستایشی هەنگاوەکانی حکوومەتی هەرێمی کوردستانیان کرد بۆ ئەنجامدانی چاکسازیی لە دامودەزگاکانی حکوومەت، بەتایبەتی لە وەزارەتی پێشمەرگەدا.











باسنيوز